बिधान र बिशालको जोडीलाई हरिसिद्धि ब्याडमिन्टन उपाधि
काठमाडौं । कास्कीका बिधान अधिकारी र बिशाल खड्काको जोडीले हरिसिद्धि खुल्ला ब्याडमिन्टन प्रतियोगिताको उपाधि उचालेका छन् ।
सो जोडीले प्रयागपोखरी ब्याडमिन्टन क्लबका पनिव लिनथेप र सुरोज महर्जनको जोडीलाई २१–१९, १९–२१ र २२–२० को सेटले पराजित गर्दै उपाधि जितेका हुन् ।
बिधान र बिकासको जोडीले पविन र सुरोजको जोडीलाई बाह्रबिसे कपमा पनि पराजित गर्दै उपाधि उचालेका थिए ।
बिजयी टिमले ५० हजार नगद मेडल, ट्रफी र प्रमाण पत्र प्राप्त गरे ।
यस्तै, उपबिजता टिमले २५ हजार सहित मेडल, ट्रफी र प्रमाण पत्र प्राप्त गरे ।
तृतीय स्थान प्राप्त गरेका बुटवलका बिश्वास नेपाल र गणेश रायमाझी तथा एपिएफका पेम्बा शेर्पा र चितवनका राजु थापाको जोडीले नगद १० हजार, मेडल, प्रमाण पत्र र ट्रफी प्राप्त गरे ।
हरिसिद्धिस्थित आयोजककै आफ्नै कभर्डहलमा भएको प्रतियोगिताको पुरुष यु १९ तर्फको प्रतिस्पर्धामा सिक्सटिन फिदरका क्षितिज खनालले उपाधि जिते ।
उनले बालकुमारी रिमिक्स क्लबका आयुश्मान नागरीलाई २१–१२, २२–२० ले पराजित गर्दै उपाधी कब्जा गरे ।
विजेता खनालले नगद १५ हजार सहित मेडल, ट्रफी र प्रमाण पत्र प्राप्त गरे । उपविजेता नागरीले नगद १० हजार मेडल, ट्रफी र प्रमाण पत्र प्राप्त गरे ।
यस्तै तृतीय स्थान प्राप्त गरेका सूर्यदर्शन ब्याडमिन्ट क्लबका सन्तोष पनेरु र क्लब सेभेनका डेभिड थापा मगरले नगद ५ हजार सहित मेडल, ट्रफी र प्रमाण पत्र प्राप्त गरे ।
यस्तै, महिला यु १९ तर्फ योङ्गुबहालकी रोज पाण्डेले उपाधि जितिन् ।
उनले बालकुमारी रिमिक्स क्लबकी प्राथना देउबामाथी २१–१८, २१–१४ को सहज जित निकालिन् । बिजेता पाण्डेले नगद १५ हजार सहित मेडल, ट्रफी र प्रमाण पत्र प्राप्त गरिन् ।
यस्तै, उपविजेता देउबाले नगद १० हजार मेडल, ट्रफी र प्रमाण पत्र प्राप्त गरिन् । तृतीय स्थान प्राप्त गर्ने धादिङ्गकी बविता पुरी र भिन्छेबहालकी कृष्मा बज्राचार्यले नगद ५ हजार सहित मेडल, ट्रफी र प्रमाण पत्र प्राप्त गरे ।
चार दिनसम्म संचालन भएको भेट्रान युगलतर्फ पिएफसीका संजय कपाली र श्याम लामाको जोडी तथा कास्कीका दलराज आले र मनबहादुर रानाको जोडी बीच भएको प्रतिस्पर्धामा संजय र श्यामको जोडीले जित निकाले ।
सो जोडीले २१–१९, २१–१८ को जित हात पारेको हो ।
बिजयी टोलीले नगद ३० हजार, मेडल, ट्रफी र प्रमाण पत्र प्राप्त गरे ।
यस्तै, उपबिजेता टिमले नगद १५ हजार, ट्रफी, मेडल र प्रमाण पत्र प्राप्त गरे । तृतीय स्थान प्राप्त गर्ने आईबिएससीका लक्ष्मण बिसी र दिलबहादुर कदङ्गवाको जोडी तथा कालिका क्लबका लोकेश्वर भक्ति र पुर्ण श्रेष्ठको जोडीले नगद प्रत्येक टिमले ७ हजार ५ सय, मेडल, ट्रफी र प्रमाण पत्र प्राप्त गरे ।
करिब १५ लाख लागत रहेको प्रतियोगितामा यु १९ पुरुष तथा महिला एकल खुल्ला, पुरुष युगल र भेट्रान ४५ माथी गरेर चार विधामा प्रतिस्पर्धा भएको थियो ।
यु १९ पुरुष एकलतर्फ ५० खेलाडी, महिला एकलतर्फ १३, पुरुष युगलमा ५५ जोडी र भेट्रान ४५ बर्ष माथि २१ जोडीले प्रतिस्पर्धा गरेका थिए ।
बिजेता खेलाडीलाई प्रमुख अतिथी उर्जा, जलश्रोत तथा सिंचाई मन्त्री पम्फा भुषालले पुरस्कार वितरण गरेकी थिईन् ।
