जिनाब्रीको ह्याट्रिकमा बायर्नको फराकिलो जित

काठमाडौं । जर्मन बुन्डेसलिगा फुटबलमा बायर्न म्युनिखले फराकिलो जित निकालेको छ ।

मंगलबार राति भएको खेलमा बायर्नले स्टुटगार्टलाई ५-० गोल अन्तरले हराएको हो ।

बायर्नको जितमा सर्जी जिनाब्रीले ह्याट्रिक गरे । रोबर्ट लेवान्डोस्कीले दुई गोल गरे ।

खेलको ४० औं मिनेटमा जिनाब्रीले गोल गर्दै बायर्नलाई अग्रता दिलाएका थिए ।

खेलको ५३ औं मिनेटमा जिनाब्रीले व्यक्तिगत दोस्रो गोल गर्दै बायर्नलाई २-० को अग्रता दिलाए ।

६९ औं मिनेटमा लेवान्डोस्कीले गोल गर्दै टोलीको अग्रता ३-० को बनाए ।

खेलको ७२ औं मिनेटमा लेवान्डोस्कीले व्यक्तिगत दोस्रो गोल गर्दै बायर्नलाई ४-० को अग्रता दिलाए ।

यस गोलसँगै लेवान्डोस्कीले बुन्डेसलिगामा एकै वर्ष सर्वाधिक धेरै गोल गर्ने खेलाडीको कीर्तिमानममा बराबरी गरे ।

यस वर्ष ४२ गोल गरेका उनले गर्ड मुलरको कीर्तिमान बराबरी गरेका हुन् ।

त्यसपछि खेलको ७४ औं मिनेटमा जिनाब्रीले ह्याट्रिक पूरा गर्दै बायर्नलाई ५-० को जित दिलाए ।

यस जितसँगै बायर्नले १६ खेलमा ४० अंक जोडेको छ ।

बायर्नले शीर्ष स्थानमा ९ अंकको अग्रता बनाएको छ ।

स्टुटगार्ट १७ अंक जोडेर १५ औं स्थानमा रहेको छ ।