काठमाडौं । सहिद स्मारक 'ए' डिभिजन लिग फुटबलमा थ्री स्टारले फ्रेन्ड्स क्लबसँग बराबरी खेल्दै अंक बाडेको छ ।
शुक्रबार भएको खेलमा थ्री स्टारले फ्रेन्ड्ससँग १-१ गोलको बराबरी खेलेको हो ।
बराबरीपछि थ्री स्टारका सहायक प्रशिक्षक रबिन्द्र सिलाकारले एक फरवार्ड राखेर खेल्दा कठिन भएको बताए ।
'आज फर्मेसन परिवर्तन गरेर खेलेका थियौं । मिडफिल्डबाट गोल गर्ने मनसायमा थियौं,' उनले भने 'एक जना मात्रै फरवार्ड राखेर मिडफिल्डबाट स्कोरको आशा गर्दा केही असहज भयो ।'
उनले थ्री स्टारमा राम्रो प्रशिक्षक आवश्यक रहेको समेत बताए ।
'थ्री स्टार जस्तो टोलिलाई राम्रो प्रशिक्षक आवश्यक छ । फर्मेसन अनुसार मिडफिल्डरले स्कोर गर्नु पर्ने हो,' उनले थपे, 'लक्ष्य उपाधिनै हो तर स्ट्राइकरको कमी भईरहेको छ । हामी कोचिङ स्टाफमा पनि केही कमी छ।'
सिलाकारले अझै बलियो टिमसँग खेल्न बाँकी रहेको र विदेशी खेलाडी अनुबन्धको तयारी गरिरहेको समेत बताए ।
फ्रेन्ड्सका मुख्य प्रशिक्षक मृगेन्द्र मिश्रले अघिल्लो खेलमा भन्दा राम्रो खेलेको बताए ।
'पहिलेको भन्दा आज हामीले राम्रो खेल्यौ । दोस्रो हाफ अझ राम्रो खेल्यौ । विपक्षीलाई दबाबमा राखेका पनि थियौ,' उनले भने, 'तर, अन्त्यमा गोल खान पुग्यौ र खेल बराबरी भयो । मैले दुबै टोलिको कोचको गरेको हुनाले बराबरी हुँदा खुसी छु ।'
