मर्सीसाइड डर्बीमा लिभरपुलको जित

काठमाडौं । इंग्लिस प्रिमियर लिग फुटबलमा लिभरपुलले एभर्टनलाई पराजित गरेको छ ।

बुधबार राति भएको मर्सीसाइड डर्बीमा लिभरपुलले एभर्टनलाई ४-१ गोल अन्तरले हराएको हो ।

लिभरपुलको जितमा मोहमद सलाहले दुई गोल गरे । जोर्डन हेण्डरसन र डिएगो जोटाले एक एक गोल गरे ।

एभर्टनका डेमाराई ग्रेले एक गोल फर्काए ।

गुडिसन पार्कमा नवौं मिनेटमा हेण्डरसनले गोल गर्दै  लिभरपुललाई सुरुआती अग्रता दिलाएका थिए ।

खेलको १९ औं मिनेटमा मोहमद सलाहले गोल गरेपछि लिभरपुल २-० ले अघि रह्यो ।

३८ औं मिनेटमा ग्रेले गोल गर्दै एभर्टनलाई २-१ को स्थितिमा ल्याए ।

खेलको ६४ औं मिनेटमा सलाहले व्यक्तिगत दोस्रो गोल गरेपछि लिभरपुल ३-१ ले अघि रह्यो ।

त्यसपछि खेलको ७९ औं मिनेटमा जोटाले गोल गर्दै लिभरपुललाई ४-१ को जित दिलाए ।

यस जितसँगै लिभरपुलले १४ खेलमा ३१ अंक जोडेको छ ।

लिभरपुल लिगको तेस्रो स्थानमा रहेको छ ।

एभर्टन १५ अंक जोडेर १४ औं स्थानमा रहेको छ ।