उपाधि दाबेदार मछिन्द्र र आर्मीको बराबरी

काठमाडौं । सहिद स्मारक 'ए' डिभिजन लिग फुटबलमा साविक विजेता मछिन्द्र एफसी बराबरीमा रोकिएको छ ।

सोमबार भएको खेलमा मछिन्द्रले साविक उपविजेता त्रिभुवन आर्मी क्लबसँग गोलरहित बराबरी खेलेको हो ।  

त्रिपुरेश्वरस्थित दशरथ रंगशालामा भएको रोमान्चक खेलमा दुबै टोलीले पाएको मौकामा सदुपयोग गर्न सकेनन् । आक्रामक रुपमा प्रस्तुत भएपनि दुबै टिम गोल गर्न भने चुकेको थियो।

अघिल्लो पटकको लिगको अन्तिम खेलमा मछिन्द्रले आर्मीलाई १-० ले हराएर उपाधि चुमेको थियो ।

दशौँ मिनेटमा विशाल राईलाई फउल गरेपछि पाएको फ्रिकिकमा डिफेन्डर ओमिलाजा करिमको प्रहार फ्रेममा परेन ।

खेलको २६ औं मिनेटमा मछिन्द्रले गोलको अवसर गुमायो । रञ्‍जित धिमालको क्रसमा नुर्लान नोभ्रुजोभको प्रहार आर्मीका गोलकिपर विकेश कुथुले बचाए । सोहि रिबाउन्ड बलमा सुनिल बलको प्रहार पनि विकेशले बचाए । त्यसपछि आर्मीका सन्तोष तामाङले गोललाइनबाट बल क्लियर गरेका थिए ।

आर्मीका कप्तान भरत खवासले ३८ औं मिनेटमा पेनाल्टी क्षेत्रको ठिक बाहिरबाटको फितलो प्रहार मछिन्द्रका गोलकिपर विशाल श्रेष्ठले सहजै आफ्नो पन्जामा पारे ।

मछिन्द्रका विशाल राईको कर्नरमा ६६ औं मिनेटमा कप्तान सुजल श्रेष्ठको प्रहार फ्रेममा पर्न  सकेन ।

यस बराबरीसँगै मछिन्द्रले २ खेलमा ४ अंक जोडेको छ । मछिन्द्रले पहिलो खेलमा एनआरटीलाई २-१ ले हराएको थियो।

आर्मीको यो लगातार दोस्रो बराबरी हो । आर्मीले पहिलो खेलमा नेपाल पुलिस क्लबसँग १-१ गोलको बराबरी खेलेको थियो ।  आर्मीले २ खेलमा २ अंक जोडेको छ ।

खेलमा आर्मीका सेसहाङ आङ्देम्बे म्यान अफ दि म्याच चुनिए ।

के भन्छन् प्रशिक्षक ?

मछिन्द्र एफसीका प्रशिक्षक प्रवेश कटवालले टिममा सेन्टर फरवार्डको कमी रहेको बताएका छन् । धेरै संख्यामा फरवार्ड राखेर चर्चामा आएको मछिन्द्रका प्रशिक्षक कटवालले टिममा अझै फरवार्डकै अभाव रहेको बताए । 

सोमबार आर्मीविरुद्धको खेलपछि पत्रकारमाझ कटवालले भने, ‘फरवार्डकै कमी भयो । टिममा सेन्टर फरवार्डको अभाव देखियो ।’

प्रशिक्षक कटवालका अनुसार सेन्टर फरवार्ड रेजिन सुब्बा चोटका कारण एक महिना मैदान बाहिर रहनेछन् । सुब्बालाई मछिन्द्रले सेन्टर फरवार्डको रुपमा क्लबमा अनुबन्ध गरेको थियो । 

प्रशिक्षक कटवालले आफ्नो मु्ख्य समस्या फरवार्ड लाईनमै रहेको बताए । 

कटवालका अनुसार रेजिन एक महिना मैदान बाहिर छन् । चोटबाट फर्किएका बिमल घर्तिमगर पूर्ण रुपमा फिट भैसकेका छैनन् । विदेशी खेलाडी नुर्लान समेत पर्फेक्ट फरवार्ड पोजिसनका हैनन् । 

अभिषेक रिजालले अभ्यासमा राम्रो गरेका छन्, तर खेलमा त्यो देखिन पाएको छैन । 

‘अभ्यास अनुसारको प्रर्दशन गर्न अभिषेकलले सकेका छैनन् । उनमा आत्मविश्वासमा कमि देखिन्छ ।’ कटवालले भने । 
यस सिजनको लिगका मुख्य दुई दाबेदार मछिन्द्र र आर्मी लिगको दोस्रो चरणमा भेट गरेका थिए । दुवैले दशरथ रंगशालामा गोल रहित बराबरी खेल्दै अंक बाँडे ।

‘ठुलो खेल थियो । दुवै टिम उपाधिका लागि दाबेदार थिए । तर तीन अंक हासिल गर्न सकिएन । प्राप्त अवसर सदुपयोग पनि भएन ।’ प्रशिक्षक कटवालले भने । 

प्रशिक्षकका अनुसार मछिन्द्रले आर्मीविरुद्ध क्षमता अनुसारको खेल्न सकेन । खेलाडीले अपेक्षा अनुसारको प्रर्दशन विभागीय टिमविरुद्ध गर्न सकेनन् । 

‘आर्मी आफैमा बलियो टिम हो । क्षमता अनुसारको खेलाडीले खेल्न सकेनन् ।’ उनले भने, ‘आर्मीविरुद्ध खेल्न सधै गाह्रो हुन्छ । आर्मीले मछिन्द्रविरुद्ध अझ उत्कृष्ट खेल्यो ।’