मछिन्द्र र आर्मीका महाभिडन्त

काठमाडौं । यसपल्टको लिगको सबैभन्दा ठूलो खेलमध्ये एक सोमबार दशरथ रंगशालामा हुँदैछ र हुन सक्छ, यसको नतिजाले पूरा प्रतियोगितामा निर्णायक असर पार्न सक्नेछ ।

सहिद स्मारक लिग ए डिभिजन ०७८ मा गत वर्षका विजेता मछिन्द्र र उप विजेता आर्मी भिड्दै छन् । त्यस लिगको अन्तिम खेलमा यिनै दुई टिम भिड्का थिए । त्यस खेलमा बराबरी नै आर्मीका लागि पर्याप्त थियो, उपाधि जित्नका लागि ।

तर, खेल मछिन्द्रले जित्यो, सँगै उपाधि पनि । त्यो खेल आर्मीका लागि एन्टी क्लाइमेकस रह्यो, किनभने मछिन्द्रको १–० जितमा निर्णायक गोल पनि आत्मघाती रह्यो र यी अभाग्यशाली खेलाडी थिए, विकास तामाङ ।

यस्तोमा आर्मीसामु त्यस खेलको हारको बदला लिने अवसर हुनेछ । तर लय भने मछिन्द्रको पक्षमा छ । उसले आफ्नो पहिलो खेलमा अर्को बलियो टिम एनआरटीलाई हराएको थियो ।

आर्मीले भने पुलिससँग बराबरी खेलेको थियो । लिगका पछिल्ला पाँच संस्करणलाई आधार मान्ने हो भने नतिजा मिश्रित छन् ।

वर्ष ०७८ मा मछिन्द्र विजयी रहेको थियो भने वर्ष ०७५ मा आर्मीले ३–० जित नतिजा निकालेको थियो ।

त्यो वर्ष मछिन्द्र लिगको १३ औं स्थानमा रहेर पनि रेलिगेसनबाट बचेको थियो, किनभने त्यस लिगमा टिम तल झर्ने व्यवस्था नै थिएन् ।

वर्ष ०७० को खेल भने १–१ को बराबरीमा रह्यो । त्यो वर्ष आर्मी आफै रेलिगेसनको तनावबाट गुज्रेको थियो र १० औं स्थानमा रह्यो ।

वर्ष ०६९ मा यी टिम दुई पल्ट भिडे । पहिलो खेल मछिन्द्रले १–० ले जित्यो भने अर्को खेल १–१ को बराबरीमा रह्यो ।

वर्ष ०६८ को खेल भने गोलरहित बराबरीमा सकिएको थियो ।