जब ६ खेलाडी मात्र मैदानमा बाँकी रहे

काठमाडौं । एक टोलीमा खेलाडी अपुग भएपछि पोर्चुगलमा शीर्ष डिभिजनको फुटबल खेल बिचमै रोक्नु परेको छ ।

बेनफिकाविरुद्धको खेलका क्रममा बेलेनेन्सेसका केवल ६ खेलाडी मैदानमा बाँकी रहेपछि दोस्रो हाफमा खेल स्थगित गरिएको थियो ।

खेलको सुरुआतमा बेलेनेन्सेसले दुई गोलरक्षकसहित ९ खेलाडी मैदानमा उतारेका थिए ।

एक गोलरक्षक समेत डिफेन्समा उत्रेका थिए ।

कोरोना भाइरसका कारण १७ मध्ये केवल ९ खेलाडी उपलब्ध हुदा पहिलो हाफमै बेलेनेन्सेस ७–० ले पछि परेको थियो ।

खेलाडी घाइते भएपछि दोस्रो हाफको सुरुआतमा बेलेनेन्सेसले केवल ७ खेलाडी मैदानमा उतारेको थियो तर थप एक खेलाडी घाइते भएपछि उनीहरु ६ खेलाडीमा सिमित भए ।

जसका कारण खेल स्थगित गर्नु परेको थियो ।

बेनफिकाका अध्यक्ष रुई कोस्टाले आफ्नो टोलीलाई उक्त खेल खेल्न बाध्य पारिएको बताए ।

उनका अनुसार लिग अधिकारी तथा स्वास्थ्य अधिकारीले खेल रोक्न सक्थ्यो तर उनीहरुले त्यसो गरेनन ।

कोस्टाले पोर्चुगलको फुटबल र देशकै लागि एक कालो दिन भएको प्रतिक्रिया दिए ।

लिग तालिकामा बेनफिकापछि तेस्रो स्थानमा रहेको स्पोर्टिङ लिसबोनले विज्ञप्तीमार्फत पोर्चुगलको फुटबल गम्भिर रुपमा क्षतिग्रस्त भएको जनाएको छ ।