पोर्चुगलको जितमा रोनाल्डोको ह्याट्रिक  

काठमाडौं । सन् २०२२ मा कतारमा हुने फिफा विश्वकपको युरोपियन छनोटमा पोर्चुगलले फराकिलो जित निकालेको छ ।

मंगलबार राति भएको खेलमा पोर्चुगलले लक्जमवर्गलाई ५-० गोल अन्तरले पराजित गरेको हो ।

पोर्चुगलको जितमा कप्तान क्रिस्टियानो रोनाल्डोले ह्याट्रिक पूरा गरे ।

यस्तै ब्रुनो फर्नान्डेज र जोआ पाल्हिन्हाले एक एक गोल गरे ।

खेलको आठौं मिनेटमा पेनाल्टीमा गोल गर्दै रोनाल्डोले सुरुआती अग्रता दिलाएका थिए ।

खेलको १३ औं मिनेटमा रोनाल्डोले पेनाल्टीबाटै व्यक्तिगत दोस्रो गोल गरे ।

१७ औं मिनेटमा ब्रुनोले गोल गर्दा पोर्चुगलले ३-० को अग्रता बनायो ।

खेलको ६९ औं मिनेटमा पाल्हिन्हाले गोल गर्दै पोचुगललाई ४-० को अग्रता दिलाए ।

त्यसपछि खेलको ८७ औं मिनेटमा रोनाल्डोले ह्याट्रिक पूरा गर्दा पोर्चुगल ५-० ले विजयी भयो ।

रोनाल्डोको यो करियरको ५८ औं ह्याट्रिक हो । त्यस्तै दशौँ अन्तराष्ट्रिय ह्याट्रिक हो ।

जितसंगै समूह ‘ए’ को पोर्चुगलले ६ खेलमा १६ अंक जोडेको छ ।

पोर्चुगल समूहको दोस्रो स्थानमा रहेको छ ।

सर्बिया १७ अंकसहित शीर्ष स्थानमा छ । लक्जमवर्ग ६ अंकसहित तेस्रो स्थानमा छ ।