नेदरल्यान्ड्सको आधा दर्जन गोल

काठमाडौं । फिफा विश्वकप फुटबलको युरोपियन छनोटमा नेदरल्यान्ड्सले फराकिलो जित निकालेको छ ।

सोमबार राति भएको खेलमा नेदरल्यान्ड्सले जिब्राल्टरलाई ६-० गोल अन्तरले पराजित गरेको छ ।

नेदरल्यान्ड्सको जितमा मेम्फिस डिपेले दुई गोल गरे । यस्तै कप्तान भिर्जिल भान डाइक, डेन्जेल डुम्फ्राईज, अर्नौट डान्जुमा र डोनएल मालेनले एक एक गोल गरे ।

खेलको नवौं मिनेटमा डाइकले गोल गर्दै नेदरल्यान्ड्सलाई सुरुआती अग्रता दिलाएका थिए ।

मेम्फिसले २१ औं मिनेटमा गोल गर्दा नेदरल्यान्ड्स २-० ले अघि रह्यो । पहिलो हाफमा इन्जुरी समयमा मेम्फिसले पेनाल्टीमा गोल गर्दै नेदरल्यान्ड्सलाई ३-० को अग्रता दिलाए ।

४८ औं  मिनेटमा डेन्जेलले नेदरल्यान्ड्सका लागि चौंथो गोल गरे । खेलको ७५ औं मिनेटमा डान्जुमाले गोल गर्दा नेदरल्यान्ड्स ५-० ले अघि रह्यो ।

त्यसपछि खेलको ८६ औं मिनेटमा मालेनले गोल गर्दै नेदरल्यान्ड्सलाई ६-० को जित दिलाए ।

यस जितसँगै समूह जी को नेदरल्यान्ड्सले ८ खेलमा १९ अंक जोडेको छ ।

नेदरल्यान्ड्स समूहको शीर्ष स्थानमा रहेको छ ।

अंक विहीन जिब्राल्टर पुछारमा रहेको छ ।