आरसी-३२ 'सी' डिभिजनमा बढुवा

काठमाडौं । सुर्खेतको आरसी-३२ फुटबल एकेडेमी सहिद स्मारक 'सी' डिभिजन लिगमा बढुवा भएको छ ।

'सी' डिभिजन लिग छनोट अन्तर्गत आफ्नो अन्तिम खेलमा आइतबार झापाको समाजसेवी क्लबलाई पेनाल्टी सुटआउटमा ५-३ गोल अन्तरले पराजित गर्दै आरसी-३२ 'सी' लिगमा बढुवा भएको हो ।

एन्फा कम्प्लेक्स सातदोबाटोमा निर्धारित समय २-२ गोलको बराबरीमा सकिएपछि खेल पेनाल्टी सुटआउटमा गएको थियो । जसमा आरसी-३२ भाग्यमानी रह्यो ।

पेनाल्टीमा आरसी-३२ का युकेश तामाङ,सनम लिम्बु,बबिन बोहरा,विवेक सन्तोषी र बिदुर रुअलले गोल गरे ।

पेनाल्टीमा समाजसेवीका मान बहादुर आले, सुमन लिम्बु र टेकेन्द्र राना मगरले गोल गरे । समाजसेवीका रोजिन कार्कीको प्रहार आरसी-३२ का गोलकिपर मुकेश घर्ति मगरले बचाए ।

पेनाल्टी अघि १२ औं मिनेटमा बबिन बोहराले गोल गर्दै आरसी-३२ लाई अग्रता दिलाएका थिए ।

खेलको १९ औं मिनेटमा खगेन्द्र बयलकोटीले गोल गर्दै समाजसेवीलाई १-१ गोलको बराबरीमा ल्याए ।

खेलको २९ औं मिनेटमा विवेक सन्तोषीले गोल गर्दै आरसी-३२ लाई २-१ को अग्रता दिलाए ।

तर, खेलको ५० औं मिनेटमा हरि बहादुर आले मगरले गोल गर्दै समाजसेवीलाई २-२ गोलको बराबरीमा फर्काएका थिए ।

अब दुई टोली बढुवा हुन बाँकी रहेको छ ।

छनोट प्रतियोगितामा ७८ क्लबले प्रतिस्पर्धा गरिरहेका छन् ।  

'सी' छनोटबाट तीन टिम 'सी' डिभिजनमा बढुवा हुनेछन् ।