भारतका प्रशिक्षक भन्छन्, 'नेपाल ६ अंकको लागि योग्य'

काठमाडौं । माल्दिभ्समा जारी साफ च्याम्पियनसिप फुटबल अन्तर्गत भोलि आइतबार नेपालले भारतविरुद्ध प्रतिस्पर्धा गर्दैछ ।

मालेस्थित राष्ट्रिय रंगशालामा नेपालले बलियो टिम भारतको सामाना गर्नेछ । नेपाल र भारतबीचको नेपाली समय अनुसार खेल राति ९:४५ बजे सुरु हुनेछ ।

नेपालविरुद्धको खेल अघि भारतीय प्रशिक्षक इगोर स्टिमाचले नेपाली टोलीको प्रशंसा गरेका छन्।

शनिबार आयोजित प्रि-म्याच कन्फरेन्समा बोल्दै प्रशिक्षक इगोरले नेपाली टिमले उत्कृष्ट खेलिरहेको र ६ अंकको लागि योग्य भएको बताए ।

'नेपालले राम्रो फुटबल खेलिरहेको छ । नेपाल ६ अंकको लागि योग्य छ,' उनले भने, 'हामीले यस अघि दुई मैत्रीपूर्ण खेल खेलेका थियौं । त्यहाँ एक जित र एक बराबरी खेलेको छौँ । तर, हामी यो समय नेपालविरुद्ध डराउने छैनौँ ।'

प्रशिक्षक इगोरले श्रीलंकाविरुद्धको खेलबाट निराश भएको र नेपालविरुद्ध जित बाहेक अन्य विकल्प नभएको समेत बताए ।

साफको सर्वाधिक सफल टिम भारतले अघिल्लो दुई खेलमा बराबरी खेलेको थियो ।

पहिलो खेलमा बंगलादेशसँग १-१ गोलको बराबरी खेलेको भारतले दोस्रो खेलमा श्रीलंकासँग गोलरहित बराबरी खेलेको थियो ।

नेपालले भने लगातार दुई खेल जितेको थियो । पहिलो खेलमा माल्दिभ्सलाई १-० ले हराएको नेपालले दोस्रो खेलमा श्रीलंकालाई ३-२ ले हराएको थियो ।

नेपाल २ खेलमा ६ अंक जोडेर शीर्ष स्थानमा रहेको छ । भारत २ अंक जोडेर चौंथो स्थानमा रहेको छ ।

लगातारको दुई जितले नेपाल फाइनल नजिक रहेको छ ।  भारतलाई भने फाइनल पुग्न अबको बाँकी दुई खेल जित्नै पर्ने दबाब रहेको छ ।