काठमाडौं । दक्षिण एसियाली फुटबल प्रतियोगिता (साफ) अन्तर्गत नेपालको खेल प्रत्यक्ष प्रशारण हुने भएको छ ।
अखिल नेपाल फुटबल संघ (एन्फा)ले साफ अन्तर्गत नेपालको खेल प्रत्यक्ष हेर्न पाइने बताएको छ ।
एन्फाका अनुसार साफका खेल डिस होम अन्तर्गतको एक्सन स्पोर्टसबाट प्रत्यक्ष प्रशारण हुनेछ ।
नेपालले साफ अन्तर्गत सोमबार श्रीलंकासँग खेल्दैछ । खेल राति सवाँ ९ बजे सुरु हुनेछ । पहिलो खेलमा नेपालले माल्दिभ्सलाई १-० ले हराएको थियो ।
कसरी हेर्न पाउने भए दर्शकले ?
माल्दिभ्समा आयोजित साफ प्रतियोगितामा नेपालले पहिलो खेल घरेलु टोलीविरुद्ध खेलेको थियो । खेलको प्रत्यक्ष प्रशारण नहुँदा एन्फा लगायतको चर्को आलोचना भएको थियो ।
माल्दिभ्स फुटबल संघले प्रत्यक्ष प्रशारणका लागि ४० हजार डलर माग गरेको थियो । तर एन्फाले सार्वजनीक रुपमा आह्वान गरेको टेण्डरमा कुनैपनि कम्पनी सहभागी भएनन् ।
माल्दिभ्स एफ एले निर्धारण गरेको ४० हजार डलर निकै महङ्गो रहेको स्वयम एन्फाको समेत बुझाई थियो । नेपालले खेल्ने निश्चित भएको कम्तिमा ४ खेलका लागि ४० हजार डलर हाल्न कोही पनि सञ्चार संस्था र बिज्ञापन एजेन्सी तयार भएका थिएनन् ।
आफ्नै देशको फुटबल हेर्न नपाएपछि दर्शक तथा फुटबल समर्थकले एन्फा र नेतृत्वको सार्वजनीक रुपमा आलोचना गरेका थिए ।
कुनै कम्पनी तयारी नभएपछि सम्बन्धित देशको खेल निशुल्क हेर्न दिन एन्फाले साफ र माल्दिभ्सलाई आग्रह गरेको थियो । तर आयोजनाको अधिकार पाएको माल्दिभ्सले एन्फाको प्रस्ताव स्विकार गरेका थिएन ।
लगातारको एन्फाको आग्रहपछि माल्दिभ्सले २५ हजार डलरमा प्रतियोगिताका बाँकी खेल दिने सहमती जनायो । सोही अनुसार एन्फाले २५ हजार डलर तिर्ने सञ्चार संस्था र एजेन्सीको खोजी गरेको थियो ।
अन्तिम समयमा आएर डिस होम अन्तर्गतको एक्सन स्पोर्टसले नेपालको बाँकी खेल प्रत्यक्ष प्रशारण गर्न पाएको छ । एक्सन स्पोर्टसमा प्रत्यक्ष प्रशारण गर्न डिस होमले २५ हजार अमेरिकी डलर माल्दिभ्सको एफ एलाई तिर्न तयार भएको छ ।
आफ्नै देशको खेल हेर्न नपाउने भएपछि दर्शक तथा समर्थक एन्फा र नेतृत्वसँग रुष्ट थिए । तर एन्फालाई माल्दिभ्सले राखेको शर्त पुरा गर्ने सञ्चार संस्था र एजेन्सी नपाएर हैरान थियो ।
डिस होमले खेलको प्रत्यक्ष प्रशारणको जिम्मेवारी वहन गरेपछि एन्फालाई भने अब 'चैन' मिलेको छ । दर्शकले घरमै टिभीमार्फत नेपालको खेल प्रत्यक्ष हेर्न पाउने भएका छन् ।
-1751297393.jpeg)
