पुलिस र आर्मीको विजयी सुरुवात

काठमाडौं । विभागीय टिम नेपाल पुलिस क्लबले छैटौं संस्करणको एनभीए क्लब भलिबल च्याम्पियनसिप अन्तर्गत पुरुषतर्फ विजयी सुरुवात गरेको छ ।

त्रिपुरेश्वरस्थित राखेपको कभर्डहलमा आइतबार भएको उद्घाटन खेलमा दावाली मिलन क्लबलाई ३-० को सोझो सेटमा पराजित गर्दै पुलिसले सुखद सुरुवात गरेको हो ।

राष्ट्रिय टोलीका खेलाडीको वर्चश्व रहेको पुलिसले दावाली मिलनलाई २५-१७,२५-२१ र २५-२१ को सेटमा पराजित गर्यो ।

यस जितसँगै समूह 'बी' को पुलिसले पहिलो खेलमै महत्वपूर्ण ३ अंक जोडेको छ । दावालीले भने हारबाट प्रतियोगिताको सुरुवात गरेको छ ।

च्याम्पियनसिप अन्तर्गत नै विभागीय टिम त्रिभुवन आर्मी क्लब र एपीएफ क्लबले समेत विजयी सुरुवात गरेका छन् ।

आर्मीले कर्णाली प्रदेशलाई ३-० को सेटमा पराजित गर्यो ।  समूह 'सी' को आर्मीले कर्णालीमाथि २५-८, २५-१४ र  २५-७ को सेटमा जित निकालेको हो ।

यस्तै एपीएफले  ढोरपाटन स्पोर्ट्स क्लबलाई ३-१ को सेटमा पराजित गर्यो ।

पहिलो सेट २६-२८ ले गुमाएको एपीएफले पुनरागमन गर्दै जित निकालेको हो ।

एपीएफले त्यसपछिको सेट २५-१८, २५-१५ र २५-१५ ले आफ्नो बनायो ।

त्यस्तै गल्कोट स्पोर्ट्स क्लबले बागमती प्रदेशलाई ३-० को सोझो सेटमा हराएको छ ।

गल्कोटले बागमतीमाथि २५-१९,२५-१७ र २५-१७ को सेटमा जित निकालेको हो ।

नेपाल भलिबल संघको आयोजनामा जारी प्रतियोगितामा पुरुषतर्फ १४ टिम र महिलातर्फ ६ टिमको सहभागिता रहेको छ ।

महिलातर्फको खेल मंगलबारबाट सुरु हुनेछ ।

यस च्याम्पियनसिपबाट पुरुषतर्फ उत्कृष्ट ७ र महिलाको ५ टोलीले चैतमा आयोजना हुने क्लब लिगमा स्थान बनाउने छन् ।

च्याम्पियनसिपको विजेताले ४ लाख प्राप्त गर्दा उपविजेताले २ लाख पाउने छन् । तेस्रोले १ लाख प्राप्त गर्नेछ ।

त्यस्तै सर्वोत्कृष्ट खेलाडीले २५ हजार प्राप्त गर्दा विधागततर्फ उत्कृष्ट हुनेले १० हजार पाउने छन् ।