भारतसँग नेपाल स्तब्ध

काठमाडौं । दोस्रो अन्तराष्ट्रिय मैत्रीपूर्ण फुटबलमा भारतले नेपाललाई हराएको छ ।

दशरथ रंगशालामा आइतबार भएको दोस्रो मैत्रीपूर्णमा भारतले नेपाललाई २–१ गोल अन्तरले हराएको हो ।

भारतको जितमा कप्तान सुनिल क्षेत्री नायक रहे । उनले एक गोल गर्नुका साथै थप एक गोलको अवसर सिर्जना गरे । नेपालका तेज तामाङले एक गोल फर्काए ।

खेलको ६२ औं मिनेटमा फारुख हाजी चौधरीको गोलमा भारतले अग्रता बनाएको थियो । भारतीय डिफेन्डर चिन्गलेनसाना सिंह कोन्शामको क्रसमा सुनिल क्षेत्रीले हेडमार्फत डिबक्सभित्र उपलब्ध गराएको बलमा चौधरीले गोल गरेका थिए ।

खेलको ८० औं मिनेटमा कप्तान क्षेत्रीले गोल गर्दै भारतको अग्रता दोब्बर बनाउने काम गरे । गोलका लागि हतारिएको नेपाली टिमविरुद्ध काउन्टरमा क्षेत्रीले भारतका लागि दोस्रो गोल गरेका थिए ।

खेल सकिन तीन मिनेट अघि तेजले नेपालका तर्फबाट एक गोल फर्काए । राष्ट्रिय फुटबल टिमबाट तेजले पहिलो अन्तराष्ट्रिय गोल गर्न सफल भए । झण्डै २० यार्ड टाढाबाट तेजको शक्तिशाली प्रहारले जाली चुमेको थियो । 

साफ च्याम्पियनसिपको तयारीमा रहेको नेपालले भारतलाई मैत्रीपूर्ण खेलका लागि काठमाडौंमा आतिथ्यता प्रदान गरेको हो । भारतविरुद्ध दुई मैत्रीपूर्ण फुटबल खेलेर साफको अन्तिम तयारीमा जुट्ने नेपालको योजना छ ।

माल्दिभ्समा आयोजना हुने  साफ च्याम्पियनसिप आगामी अक्टोबर १ देखि १६ (असोज १५ देखि ३०) गतेसम्म आयोजना हुने तालिका रहेको छ। 

बिहीबार भएको पहिलो मैत्रीपूर्ण खेलमा नेपाल र भारतले १–१ गोलको बराबरी खेलेको थियो ।

प्रर्दशनबाट अलमुताइरी खुसी 

राष्ट्रिय फुटबल टिमका मुख्य प्रशिक्षक अब्दुल्लाह अलमुताइरीले दोस्रो मैत्रीपूर्ण खेलको नतिजालाई बिर्सन आग्रह गरेका छन् ।

उनले राष्ट्रिय टिमले भारतविरुद्ध उत्कृष्ट प्रर्दशन गरेको भन्दै नतिजालाई बिर्सन आग्रह गरेका हुन् ।

‘खेल मन पर्यो ?’ उनले प्रश्न गरे, ‘त्यसो भए नतिजालाई बर्सिदेउ ।’

अलमुताइरीले भारतविरुद्ध नेपालले राम्रो खेल प्रर्दशन गरेको उल्लेख गर्दै नतिजालाई सामान्य रुपमा लिन आग्रह गरे ।

‘म खुसी छु । खेलाडीको प्रर्दशनमा गर्व गर्छु । सबै चिज ठिक छ ।’ उनले भने ।

उनले भारतविरुद्धको नतिजाबाट नआत्तिन अनुरोध गरे ।

‘नतिजा खराब आएपनि प्रर्दशनबाट म धेरै खुसी छु । मसंग २४ जना गोर्खाली खेलाडी छन् । आशा गरौं हामी साफ जित्नेछौं ।’ उनले भने ।

भारतीय प्रशिक्षक इगोर स्टिम्याकले दोस्रो मैत्रीपूर्ण खेलमा दुवै टिमले राम्रो खेलेको बताए ।

‘धेरै राम्रो खेल भयो । दुवै टिमले राम्रो खेले । अघिल्लो खेलभन्दा दुवै टिमको प्रर्दशन सुधारिएको थियो ।’ उनले भने, ‘दुवै टिमका खेलाडीलाई धन्यवाद दिन आवश्यक छ ।’

स्टिम्याकले तुलनात्मक रुपमा भारत धेरै राम्रो टिम रहेको बताउँदै आफ्नो खेलाडीलाई विशेष धन्यवाद दिए ।