नेपालविरुद्ध भारत : सम्पूर्ण जानकारी

काठमाडौं । नेपालले आज बिहीबार भारतसँग पहिलो मैत्रीपूर्ण फुटबल खेल खेल्दैछ।

त्रिपुरेश्वरस्थित दशरथ रंगशालामा हुने मैत्रीपूर्ण खेल अपरान्ह ५:३० बजे सुरु हुनेछ ।

दुबै टिम जित निकाल्ने लक्ष्यसहित मैदान उत्रने छन् ।

नेपालले भारतसँग दोस्रो खेल भने आइतबार खेल्नेछ ।

माल्दिभ्समा आयोजना हुने साफ च्याम्पियनसिपको तयारीका लागि नेपालले भारतसँग मैत्रीपूर्ण खेल खेल्न लागेको हो।

साफ च्याम्पियनसिप अक्टोबर १ देखि १६ (असोज १५ देखि ३०) गतेसम्म आयोजना हुनेछ।

दर्शकलाई प्रवेश -

कोरोना महामारीबीच हुन लागेको मैत्रीपूर्ण खेलमा दर्शकलाई प्रवेश दिईने भएको छ।

अखिल नेपाल फुटबल संघ एन्फाले ५१ सय दर्शकलाई सरकारले अनुमति दिएको जनाएको छ ।

तर, खेल हेर्ने दर्शकले कोभिडको पूर्ण खोप लगाएको हुनु पर्नेछ। अथवा कोरोना परिक्षणको रिपोर्ट नेगेटिभ आएको देखाउनु पर्नेछ।  

टिकट मूल्य -

सरकारले दर्शकलाई अनुमति दिएसँगै एन्फाले दुई मैत्रीपूर्ण खेलको टिकट मूल्य तोकेको छ ।

एन्फाले सामान्य प्यारापिटतर्फ १ हजार र भीआईपीतर्फ २ हजार टिकट मूल्य राखेको छ ।

टिकट प्रभु पेबाट किन्न सकिनेछ ।  

प्रत्यक्ष प्रशारण -

मैत्रीपूर्ण अन्तर्गत दुबै खेल टेलिभिजनबाट प्रत्यक्ष प्रशारण हुनेछ ।

एन्फाले हिमालय टेलिभिजनबाट प्रत्यक्ष प्रशारण हुने जनाएको छ ।