लेवान्डोस्कीलाई 'फुटबलर अफ द इयर' अवार्ड

काठमाडौं । बायर्न म्युनिखका स्ट्राइकर रोबर्ट लेवान्डोस्कीले जर्मनी फुटबलर अफ द इयर अवार्ड पाएका छन्।

फुटबल म्यागजिन किकरले शनिबार लेवान्डोस्कीलाई जर्मनी फुटबलर अफ द इयर अवार्ड प्रदान गरेको हो।

जर्मन बुन्डेसलिगा अन्तर्गत बायर्न र हेर्था बर्लीनबीचको खेल अघि उनलाई अवार्ड प्रदान गरिएको हो।

 लेवान्डोस्कीले ह्याट्रिक गरेपछि उक्त खेलमा बायर्नले बर्लीनलाई ५-० गोल अन्तरले पराजित गरेको थियो।

जर्मनीको खेल पत्रकारहरुको भोटका आधारमा लेवान्डोस्की वर्ष खेलाडी चुनिएका हुन् ।

३३ वर्षीय लेवान्डोस्कीले थोमस मुलर र अर्लिङ हालाण्डलाई पछि पार्दै अवार्ड जितेका हुन् । उनले ३५६ भोट पाएका थिए । मुलरले ४१ र हालाण्डले ३८ भोट पाएका थिए ।

गत सिजन जर्मन बुन्डेसलिगा फुटबलमा लेवान्डोस्की सर्वाधिक गोलकर्ता बनेका थिए । च्याम्पियन टिम बायर्नका लेवान्डोस्कीले ४१ गोल गरेका थिए  ।

लेवान्डोस्कीले एकै सिजन बुन्डेसलिगामा सर्वाधिक गोल गर्ने खेलाडीको कीर्तिमान समेत बनाएका थिए ।

लेवान्डोस्कीले बायर्नका लिजेण्ड खेलाडी गर्ड मुलरको कीर्तिमान भङ्ग गरेका हुन् । मुलरले सन् १९७१/७२ को सिजन ४० गोल गर्दै कीर्तिमान बनाएका थिए ।