टेलरको ४६ बलमा शतक, जिम्बाब्वे १७० रनले विजयी

काठमाडौं। भ्रष्टाचार र डोपिङ नियम उल्लंघन कारण प्रतिबन्ध भोगेपछि गत अगस्टमा राष्ट्रिय टोलीमा फर्किएका जिम्बाब्वे ब्याटर तथा विकेटकिपर ब्रेन्डन टेलरले अन्ततः आफ्नो पुरानो रूप झल्काएका छन्।

३९ वर्षीय टेलरले आइतबार हरारेमा भएको विश्वकप टी–२० छनोटको अफ्रिका क्षेत्रको खेलमा बोट्स्वानाविरुद्ध शतक प्रहार गर्दै जिम्बाब्वेलाई ठूलो जित दिलाए।

पहिले ब्याटिङ गर्दै जिम्बाब्वेले निर्धारित २० ओभरमा ५ विकेटको क्षतिमा २५९ रनको विशाल योगफल बनायो। टेलरले ५४ बलमा १६ चौका र ५ छक्कासहित १२३ रन बनाए। उनले ४६ बलमै शतक पुरा गरेका थिए।

रिटायर्ड आउट हुनु अघिसम्म उनको ब्याटिङ शो चलेको थियो। यस उपलब्धिसँगै ३९ वर्ष २३४ दिन उमेरमा टेलर अन्तर्राष्ट्रिय टी–२० मा शतक बनाउने दोस्रो सबैभन्दा पाको खेलाडी बनेका छन्।

टेलरलाई ओपनर ब्रायन बेनेटले उत्कृष्ट साथ दिए। दुवैले मिलेर ५० बलमा ११२ रनको साझेदारी गरे। बेनेटले ३३ बलमा ७ चौका र ४ छक्कासहित ६५ रन जोडे। सिकन्दर राजाले अन्तिमतिर १० बलमा २१ रनको योगदान दिए।

जवाफी ब्याटिङमा उत्रिएको बोट्स्वाना पूरै २० ओभर खेले पनि ८ विकेट गुमाउँदै ८९ रनमै सीमित भयो। टोलीका दुई ब्याटर मात्र दोहोरो अंकमा पुगे। मनरुक्स क्यासलम्यान (३५ बलमा २६) र थारिन्दु पेरेरा (३२ बलमा ३१)ले हाने।

जिम्बाब्वेका रिचार्ड एनगराभा र रायन बर्लले २–२ विकेट लिएका थिए भने मुझाराबानी, मापोसा, इभान्स र सिकन्दर राजाले समान १–१ विकेट लिए।

जिम्बाब्वेले यो खेल १७० रनको विशाल अन्तरले जितेको हो। फर्किए पनि अन्त्य देखिएको टेलर अझै क्रिकेटलाई दिने बाँकी छ भन्ने प्रमाणित गर्दै सानदार शतक प्रहार गरेका छन्।