रियललाई उछिन्दै बार्सिलोना शीर्ष स्थानमा

काठमाडौं। गत शनिबार एट्लेटिको मड्रिडसँग ५–२ ले पराजित भएपछि रियल मड्रिडले लिगको शीर्ष स्थान गुमाउने चिन्ता बढेको थियो। त्यो शंका आइतबार वास्तविकतामा परिणत भयो। रियल सोसिडाडलाई पराजित गर्दै बार्सिलोना लिग तालिकाको शीर्ष स्थानमा उक्लिएको छ।

ओलिम्पिक स्टेडियममा बार्सिलोनाले सोसिडाडलाई २–१ गोलले पराजित गर्‍यो। खेलको सुरुआतमा पछि परे पनि क्याटलान क्लबले उत्कृष्ट कमब्याक गर्दै जित दर्ता गर्‍यो।

३१औं मिनेटमा अल्भारो ओड्रिओजोलाले गोल गर्दै सोसिडाडलाई अग्रता दिलाएका थिए। तर, पहिलो हाफ सकिनुअघि फ्रेन्च डिफेन्डर ज्युल्स कुन्देले कार्नर किकबाट हेडिङ गोल गर्दै बार्सिलोनालाई बराबरीमा फर्काए।

दोस्रो हाफको सुरुदेखि नै आक्रामक बनेको बार्सिलोनाले ५९औं मिनेटमा रोबर्ट लेवान्डोव्स्कीको गोलमार्फत अग्रता लियो। त्यसपछि थप दुई गोलको अवसर सिर्जना भए पनि बल पोस्टमा ठोकिँदा गोल हुन सकेन। अन्ततः २–१ को जित निकाल्दै बार्सिलोनाले मैदान छाड्यो।

७ खेलमा १९ अंकसहित बार्सिलोना लिगको शीर्ष स्थानमा पुगेको छ भने समान खेलमा मड्रिड १८ अंकसहित दोस्रो स्थानमा छ। सोसिडाड भने ५ अंकमा सीमित रहँदै १७औं स्थानमा छ।