काठमाडौं । अट्याकिङ मिडफिल्डर प्रिती राईले आफुले गरेको मेहेनतको कारण राष्ट्रिय टिममा पर्न सफल भएको बताएकी छिन् ।
पहिलो पटक राष्ट्रिय टिममा परेकी प्रितीले बिहीबार एन्फा कम्प्लेक्समा संचारकर्मीसँग कुरा गर्दै मेहेनतको कारण टिममा पर्न सफल भएको बताएकी हुन् ।
'बन्द प्रशिक्षणमा पहिले पनि छनोट भएको थिए । टिममा पहिलो पटक पर्दा खुशी लागेको छ,' उनले भनिन्, 'मेहेनत गरेको फल अहिले आउदैछ । ट्रेनिङ राम्रो भईरहेको छ।'
मुख्य प्रशिक्षक ग्यारी फिलिप्सले एएफसी महिला एसियन कप-२०२२ छनोटका लागि घोषणा गरेको २३ सदस्यीय टिममा प्रिती अटाएकी हुन् । उनीसँगै ७ खेलाडीले पहिलो पटक टिममा स्थान बनाएका छन् ।
उज्वेकिस्तानमा आयोजना हुने छनोटमा नेपाल समूह 'एफ' मा रहेको छ । नेपालको समूहमा फिलिपिन्स र हङकङ रहेको छ ।
प्रितीले छनोटमा मैदान उत्रने मौका पाएमा नेपालको लागि उत्कृष्ट प्रदर्शन गर्ने समेत बताईन् ।
'डेब्यु भन्दा पनि आफ्नो खेललाई सुधार गर्नेछ र जब मौका पाउछु आफ्नो उत्कृष्ट दिन्छु भन्नेछ,' उनले भनिन्, 'डेब्यु मेरो प्रदर्शन अनुसार हुन्छ । सरहरूले मलाई कुन रुपमा लिनु हुन्छ र कस्तो प्रदर्शन गर्छु त्यसमा हुन्छ । जहाँसम्म लाग्छ राम्रो भईरहेको छ । मौका पाउछु होला ।'
एपीएफ क्लबकी प्रितीले नेपालको उमेर समूहको टिमबाट खेलिसकेकी छिन् । प्रितीले यू-१५ टोलीको कप्तानी गरिसकेकी छिन् ।
प्रितीले क्लबका लागि खेल्दा र राष्ट्रिय टिमका लागि खेल्दा फरक हुने समेत बताईन् । आफ्नो खेललाई माथिल्लो स्तरमा लैजान आफुले प्रयास गरिरहेको समेत उनले बताईन् ।
'क्लब र राष्ट्रिय टिमबाट खेल्नु फरक हुन्छ । क्लबमा हुँदा ढुक्कले खेल्न पाइन्छ तर राष्ट्रिय टिममा खेल्दा मानसिक दबाब हुन्छ । राष्ट्रिय टिममा हुँदा धेरै सिकिन्छ । जुन लेभलमा खेल्दै आएका हुन्छौं त्यो राष्ट्रिय टिममा हुँदैन । आफ्नो स्तर माथिल्लो बनाएर खेल्नु पर्छ । माथिल्लो स्तरमा जान प्रयास गरिरहेको छु,' ' प्रिती भन्छिन् ।मा
विदेशी प्रशिक्षकसँग घुलमिल हुन सुरुवातमा गार्हो भएको तर अहिले अभ्यस्त भएको उनले बताईइन् । प्रितीले टिममा आफु नयाँ खेलाडी हो भन्ने अनुभव नभएको समेत बताईन् ।
' पहिलो पटक विदेशी कोच हुनुहुन्छ । सुरुमा घुलमिल हुन गार्हो भयो । हामीलाई नयाँ जस्तो अनुभव भएको छैन । दिदिहरुले सपोर्ट गर्नु भएको छ,' उनले थपिन, 'सिनियर दिदिहरु (खेलाडी) सँग खेल्न पाउदा खुशी छु र प्रतिस्पर्धाको रुपमा समेत लिन्छु ।'
