काठमाडौं । नेपाली राष्ट्रिय महिला फुटबल टिमका मुख्य प्रशिक्षक ग्यारी फिलिप्सले टिमको लक्ष्य एएफसी महिला एसियन कप-२०२२ मा छनोट हुने बताएका छन् ।
एन्फा कम्प्लेक्स सातदोबाटोमा बिहीबार संचारकर्मीसँग कुरा गर्दै प्रशिक्षक फिलिप्सले एसियन कपमा छनोट लक्ष्य लिएको बताएका हुन् ।
'हामी दैनिक प्रगति गरिरहेका छौँ । पक्कै पनि हामी एसिया कपका लागि छनोट हुन चाहन्छौ । हाम्रो ध्यान हरेक दिन राम्रो गर्नेमा केन्द्रित छ,' प्रशिक्षक फिलिप्सले भने ।
नेपाली महिला टिमले एसियन कपका लागि उज्वेकिस्तानमा आयोजना हुने छनोट प्रतियोगितामा सहभागिता जनाउनेछ । छनोटमा नेपाल समूह 'एफ' मा रहेको छ । नेपालको समूहमा फिलिपिन्स र हङकङ रहेको छ ।
नेपालले फिलिपिन्ससँग खेल्दै छनोटको सुरुवात गर्नेछ । नेपाल र फिलिपिन्सबीचको खेल सेप्टेम्बर १८ (असोज २) गते जेएआर स्टेडियममा हुनेछ ।
यस्तै नेपालले दोस्रो खेलमा हङकङको सामना गर्नेछ । उक्त खेल सेप्टेम्बर २१ (असोज ५) मा हुनेछ ।
यस समूहको फिलिपिन्स र हङकङबीचको खेल सेप्टेम्बर २४ (असोज ८) मा हुनेछ ।
समूहको शीर्ष टोलीले अर्को वर्ष भारतमा हुने एसियन कप खेल्नेछ । एसियन कप जनवरी २० देखि फेब्रुअरी ६ सम्म हुनेछ ।
प्रशिक्षक फिलिप्सले नेपाली टोलीलाई उज्वेकिस्तानको मौषमले भने चुनौती दिने बताए ।
'फिलिपिन्ससँगको हाम्रो खेल दिउँसोको ३ बजे छ र हामी खुशी छैनौँ किनकी उज्वेकिस्तानको मौषम ३५/३६ डिग्री छ । म अपिल गर्न चाहन्छु, खेल समय ६ वा ७ बजे सुरु होस्,' उनले भने, 'हामीलाई उज्वेकिस्तानको मौषमको चुनौती छ ।'
प्रशिक्षक फिलिप्सले २३ सदस्यीय नेपाली टिमको घोषणा गरिसकेका छन् । ७ खेलाडीले पहिलो पटक राष्ट्रिय टिममा स्थान बनाएका छन् ।
मिडफिल्डर प्रिती राई, फरवार्ड रश्मी घिसिङ,सबिता राना, रजनी थोकर, डिफेन्डर विमला विक, सृजना सिंह र निशा थोकर पहिलो पटक राष्ट्रिय टिममा परेकी छिन् ।
'म खुशी छु, हामीसँग २३ खेलाडी छन् । हामीसँग युवा र अनुभवी गरि मिश्रित टिम छन्,' प्रशिक्षक फिलिप्सले थपे, 'तपाईले विश्व फुटबलको ट्रेण्ड हेर्न सक्नु हुन्छ, छिटो र ऊर्जावान खेल छ । म हाम्रो टिमबाट खुशी छु ।'
उज्वेकिस्तान जानु अघि नेपालले बंगलादेशसँग दुई मैत्रीपूर्ण खेल खेल्नेछ ।
नेपाली टोलीले बंगलादेशी टोलीसँग सेप्टेम्बर ९ र १२ (भदौ २४-२७) गते दशरथ रंगशालामा खेल्ने एन्फाले जनाएको छ ।
नेपाली टिम :
अन्जना राना मगर, एन्जिला सुब्बा, उषा नाथ, अमृता जैशी, अनिता बस्नेत,अनिता केसी, विमला बिक, विमला चौधरी, दिपा राई, गीता राना, हिरा भुजेल, इन्द्र राई, मन्जली थोकर, निशा थोकर, प्रिती राई, पुजा राना, पुनम जर्गा मगर, रजनी थोकर, रश्मी घिसिङ, रेनुका नगरकोटी, सबिता राना, सरु लिम्बु, सिर्जना सिंह
