फेडेरर विश्व टेनिसकै ‘गोट’

काठमाडौं । विश्व टेनिसका लागि अगस्ट ८ खुसी बनाउने राम्रै बहाना बन्यो । नहोस पनि किन र ? यो रोजर फेडेररको जन्म दिन हो । त्यसो त यसअघि पनि उनको जन्म दिन नआएको पनि कहाँ हो र ? यसपल्ट भने विशेष रह्यो । स्विस खेलाडी ४० वर्षका भए । उनी अझै खेलिरहेका छन्, यो अर्को महत्त्वपूर्ण तथ्य रह्यो ।

फेडेररलाई विश्व टेनिसको ‘गोट’ पनि भनिन्छ । ‘गोट’ को अर्थ हुन्छ, ‘ग्रेटेस्ट अफ अल टाइम’ । फेडेररको नाम आएपछि उनीसँगै अरू दुई जना खेलाडीको नाम पनि जोडिएर आउँछ र उनीहरू हुन्, राफेल नाडाल र नोभाक जोकोभिच । यी दुवै खेलाडी पनि ‘गोट’ नै हुन् । यी तीन खेलाडीले पछिल्लो दुई दशक जतिको समयमा एकछत्र राज गरेका छन् ।

त्यसैले भन्ने गरिन्छ, अहिलेका टेनिस प्रशंसक सबैभन्दा भाग्यमानी हुन्, किनभने उनीहरूले एकै कालखण्डमा तीन ‘गोट’ खेलाडीलाई हेर्न पाए । अहिलेका विश्व नम्बर १ खेलाडी हुन्, जोकोभिच । उनी फेडेररलाई जन्मदिनको शुभकामना दिनेमध्ये सबैभन्दा अगाडि रहे । उनले भनेका छन्, ‘४० औं वर्ष दिनको शुभकामना । ४० वर्ष, ह्वाउ ।’

उनले थपेका छन्, ‘यो कोशेढुंगा उपलब्धी हो । फेडेरर सबैका लागि प्रेरणाको स्रोत हुन । चाहे त्यो कोर्ट बाहिर होस अथवा भित्र । फेडेररविरुद्ध खेल्न पाउनु पनि सबैका लागि भाग्यमानी हुनु हो ।’ फेडेररले २० ग्रान्ड स्लाम उपाधि जितेका छन् र यो कीर्तिमान हो । नाडालले पनि २० ग्रान्ड स्लाम जितेका छन् । अनि जोकोभिचले पनि ।

हाम्रो पनि फेडेररलाई ४० औं जन्मदिनको शुभकामना ।

 
–मार्काको सहयोगमा ।