एन्फा विवाद : राखेपद्वारा छानबिन समिति गठन

काठमाडौं । राष्ट्रिय खेलकुद परिषद् (राखेप) ले अखिल नेपाल फुटबल संघ (एन्फा)  विवादको छानबिन गर्न समिति गठन गरेको छ ।

राखेपको कार्यकारी समितिको बैठकले बोर्ड सदस्य पुरेन्द्र बिक्रम लाखेको संयोजकत्वमा मंगलबार ७ सदस्यीय समिति गठन गरेको हो ।

समितिमा रेनुका श्रेष्ठ, सुर्वण श्रेष्ठ, चन्द्र बन्दना राई, अर्जुन बिक, नारायण अर्याल र सरोज पोखरेल सदस्य रहेका छन् ।

राखेपले समितिलाई सात दिन भित्र छानबिनको प्रतिवेदन बुझाउन निर्देशन दिएको छ । समितिले दुइ खेलपत्रकारले दिएको उजुरीको विषयमा समेत छानविन गर्नेछ ।

पछिल्लो समय राष्ट्रिय फुटबल टिमका मुख्य प्रशिक्षक अब्दुल्लाह अलमुताइरी र वरिष्ठ उपाध्यक्ष पंकज नेम्वाङबीच विवाद देखिएको छ ।

प्रशिक्षक अलमुताइरीले गत आइतबार वरिष्ठ उपाध्यक्षका कारण आफुले राजीनामा दिने घोषणा गरेका थिए ।

प्रशिक्षकले वरिष्ठ उपाध्यक्षले केही हप्तादेखि आफुलाई काम गर्न नदिएको आरोप लगाएका थिए ।

आफुमाथि गम्भिर आरोप लागेपछि नेम्वाङले छानबिनका लागि एन्फामा निवेदन दिएका थिए । लगत्तै प्रशिक्षकले समेत दुई पत्रकार सहित वरिष्ठ उपाध्यक्षमाथि छानबिनका लागि निवेदन दिएका थिए ।

एन्फाले प्रशिक्षक र वरिष्ठ उपाध्यक्षको निवेदनमाथि छलफल गर्न आकस्मिक कार्यसमिति बैठक समेत आह्वान गरेको थियो ।

त्यहि बैठकले विवाद छानबिनका लागि युवा तथा खेलकुद मन्त्रालयमा निवेदन दिने निर्णय गरेको थियो ।

एन्फाले मुख्य प्रशिक्षक र वरिष्ठ उपाध्यक्षबीचको विवाद छानबिनका लागि आग्रह गरेपछि मन्त्रालयले सोमबार राखेपलाई छानबिनका लागि निर्देशन दिएको थियो ।