काठमाडौं । अहिले ‘फुटबलमा रूचि राख्ने’ सबैको मुखमा भुन्डिएको नाम हो, ज्याक ग्रेलिस । पछिल्लो सिजन इंग्लिस प्रिमियर लिगमा उनी एस्टन भिल्लाका लागि राम्रै लयमा रहे, अनि युरो २०२० मा उनी इंग्ल्यान्डका लागि ‘पोस्टर ब्वाइ’ सावित भए ।
अब यिनै खेलाडी कीर्तिमान मूल्यमा म्यानचेस्टर सिटी जाने संघारमा छन्, सबै स्थिति अनुकुल रहे ।
सिटीको घरेलु र युरोपेली उपाधिको महत्त्वकांक्षाका लागि ग्रेलिस महत्त्वपूर्ण खेलाडी हुनेछन् । यस्तै सोच्छन्, सिटीका व्यवस्थापक पेप ग्वार्डिओला पनि ।
भिल्लाले आफ्ना चमत्कारी खेलाडीका लागि तोकेको मूल्य पनि कम्तीको छैन् । उसको दाबी रहेको छ, ग्रेलिस किन्ने हो भने १० करोड पाउन्ड तिर्नु पर्छ ।
यो सबै ग्रेलिसको आफ्नै उत्कृष्ट प्रदर्शनले सम्भव भएको हो । धेरै होइन, केही वर्ष अगाडि मात्र कसैले उनको मूल्य १० करोड पाउन्ड भन्छ भने ‘फुटबलमा रूचि राख्ने सबै’ले मजाककै रूपमा लिने थिए ।
सन् २०१७ मा भिल्लाका व्यवस्थापक स्टिभ ब्रुस थिए र उनको योजना थियो, ग्रेलिसलाई बेच्ने र उनको स्थानमा मिडल्सब्रोका जोर्डन रोड्सलाई ल्याउने ।
यस्तो किन भन्दा ग्रेलिसले त्यति बेलासम्म आफूलाई सन्की किशोर खेलाडीकै रूपमा स्थापित गरेका थिए । उनलाई अनुशासन तोड्नमा सायद मज्जा आउने गथ्र्यो । फेरि ग्रेलिसको अर्को एउटा खराब बानी पनि थियो, खेलका क्रममा रेफ्रीको बढी नै गुनासो गर्ने, अनि सके रेफ्रीसँग बाझाबाझ पनि गर्ने ।
तर मिहिनेत गरेपछि मात्र फल पाइन्छ भनेर त्यसै भनिएको त पक्कै होइन्, ग्रेलिसले आफूलाई परिवर्तन मात्र गरेनन्, अब्बल दर्जाका खेलाडी पनि बनाए ।
भिल्ला च्याम्पियनसिपमा रहेको बेला उनले खुबै मिहिनेतले खेले र अन्तत: क्लब पनि प्रिमियर लिगमा पुग्यो । अहिले यिनै खेलाडीको मूल्य पुगेको छ, अविश्वसनीय रूपमा १० करोड पाउन्ड ।
–मिररको सहयोगमा ।
