चितवन टाईग्रेस महिला लिग भलिबलको उपाधि नजिक
काठमाडौं । चितवन टाईग्रेस राजधानीमा जारी आदीअवादी महिला लिग भलिबलको फाइनलमा प्रवेश गरेको छ ।
मंगलबार भएको पहिलो सेमिफाइनलमा विभागीय टिम नेपाल पुलिस क्लबलाई ३ - ० को सोझो सेटमा हराएर चितवन उपाधि नजिक पुगेको हो ।
त्रिपुरेश्वरस्थित राखेप कबर्डहलमा चितवनले पुलिसलाई २५-११,२५-१४ र २५-२३ सेटमा पाखा लगायो ।
अब चितवनले बुधबार हुने फाइनलमा एपीएफ क्लब र न्युडायमण्ड एकेडमीबीचको विजेतासंग खेल्नेछ ।
जारी लिगमा चितवन समूह 'ए' को विजेता बन्दै सेमिफाइनलमा पुगेको थियो । यस्तै पुलिस समूह 'बि' को उपविजेता बनेको थियो ।
नेपाल भलिबल संघ र आदीअवादी फाउन्डेसनको आयोजनामा जारी प्रतियोगिताको बिजेताले ६ लाख नगद प्राप्त गर्ने छ । त्यस्तै उपबिजेताले ३ लाख र तेश्रो हुनेले १ लाख ५० हजार प्राप्त गर्ने छन् ।
प्रतियोगिताको उत्कृष्ट खेलाडीले एक थान स्कुटर र नगद ५० हजार प्राप्त गर्ने छन् ।
