'ग्राण्डस्लामको श्रेय रोजर र नाडाललाई जान्छ'

एजेन्सी । विश्व नम्बर एक सर्बियन खेलाडी नोभाक जोकोभिचले आइतबार विम्बल्डन टेनिसको उपाधि हात पारे ।

लण्डनमा इटालीका माटियो बेरेटिनीलाई पराजित गर्दै जोकोभिचले छैटौं पटक विम्बल्डन आफ्नो नाममा लेखाए ।

विम्बल्डन जोकोभिचको करियरको २० औं ग्राण्डस्लाम उपाधि समेत हो ।

यससँगै जोकोभिचले स्विस स्टार रोजर फेडेरर र स्पेनिस स्टार राफायल नाडालले बनाएको सर्वाधिक ग्राण्डस्लाम जित्ने खेलाडीको कीर्तिमानसँग बराबरी समेत गरे ।

२० औं ग्राण्डस्लाम जितेपछि जोकोभिचले यस सफलताको श्रेय फेडेरर र नाडाललाई दिए ।

'मैले पहिले पनि उल्लेख गरेको छु । मैले राफा र रोजरलाई ठुलो आदर दिनु पर्दछ । उनीहरु हाम्रो खेलका लिजेण्ड हुन्,' उनले भने, 'मैले करियरमा सामना गरेका दुबै महत्वपूर्ण खेलाडी हुन् । '

जोकोभिचले रोजर र नाडालकै कारण आफु यस स्थानमा आईपुगेको बताए ।

'म यहाँ हुनुको कारण उनीहरु हो । उनीहरुले मलाई मानसिक, शारीरिक र प्राविधिक रुपमा बलियो हुनुपर्छ भन्ने सिकाए,' जोकोभिचले थपे ।

३४ वर्षीय जोकोभिचले आफुसहित तीनै जना २० औं ग्राण्डस्लाम उपाधिमा नरोकिने बताए  । उनले तीनै जना थप ग्राण्डस्लाम जित्न सक्षम रहेको बताए ।