न्युडायमण्डलाई हराएर चितवन बन्यो समूह विजेता
काठमाडौं । चितवन टाईग्रेस आदीअवादी महिला लिग भलिबलको समूह 'ए' बाट समूह विजेता बनेको छ ।
सोमबार भएको खेलमा न्युडायमण्ड एकेडमीलाई ३ - १ को सेटमा हराएर चितवनले समूह विजेता बनेको हो ।
त्रिपुरेश्वरस्थित राखेप कबर्डहलमा चितवनले न्युडायमण्डमाथि २५-१९,२७-२९,२५-१९ र २८-२६ को सेटमा पाखा लगायो ।
जितसंगै चितवनले ३ खेलबाट ६ अंक जोड्न सफल भयो । न्युडायमण्डले ३ खेलबाट २ अंक जोडेको छ ।
चितवन र न्युडायमण्डले आइतबार नै सेमिफाइनलमा स्थान बनाएका थिए । यस समूहबाट त्रिभुवन आर्मी क्लब समूह चरणबाट बाहिरियो ।
यस्तै समूह 'बि' बाट एपीएफ क्लब र नेपाल पुलिस क्लबले सेमिफाइनलमा स्थान बनाएका छन् ।
एपीएफले ६ अंक जोडेर समूह विजेता बन्दै सेमिफाइनलमा पुगेको हो । पुलिस २ अंक जोडेर उपविजेता बन्दै सेमिफाइनलमा पुगेको हो ।
अब सेमिफाइनलमा एपीएफले न्युडायमण्ड र पुलिसले चितवन टाईग्रेससंग प्रतिस्पर्धा गर्नेछन् ।
नेपाल भलिबल संघ र आदीअवादी फाउन्डेसनको आयोजनामा जारी प्रतियोगिताको बिजेताले ६ लाख नगद प्राप्त गर्ने छ । त्यस्तै उपबिजेताले ३ लाख र तेश्रो हुनेले १ लाख ५० हजार प्राप्त गर्ने छन् ।
प्रतियोगिताको उत्कृष्ट खेलाडीले एक थान स्कुटर र नगद ५० हजार प्राप्त गर्ने छन् ।
