काठमाडौं । फिफा विश्वकप–२०२२ तथा एसियन कप–२०२३ अन्तर्गत दोस्रो चरणको छनोटको अन्तिम खेलमा नेपालले आज (शुक्रबार) अष्ट्रेलियासँग प्रतिस्पर्धा गर्दैछ ।
कुवेत सिटीस्थित जाबेर अल अहमद अन्तराष्ट्रिय मैदानमा नेपाल र अष्ट्रेलिया दोस्रो पटक आमने सामने हुनेछ ।
शारीरिक तथा प्राविधिक रुपमा बलियो अष्ट्रेलिया नेपालविरुद्ध सहज जित निकाल्दै तालिकाको शीर्ष स्थानमा रहदै विश्वकप छनोटको तेस्रो चरण नजिक पुग्न चाहन्छ । एसिया कपको पूर्व विजेता समेत रहेको अष्ट्रेलिया समूह 'बी' बाट छनोट नजिक रहेको छ ।
यता, नेपाल भने अष्ट्रेलियाविरुद्ध जित भन्दा पनि सुधारिएको प्रदर्शन गर्न चाहन्छ । युवा खेलाडीको बाहल्यता रहेको नेपाली टिमलाई प्रशिक्षक अब्दुल्लाह अलमुताईरीले फरक रणनीतिमा मैदान उतार्ने छन् ।
नेपाल र अष्ट्रेलिया यस अघि एक पटक खेलेका थिए । पहिलो भेटमा नेपाललाई पूर्ण रुपमा दबाबमा राखेको अष्ट्रेलियाले सहज जित हासिल गरेको थियो ।
अष्ट्रेलियाले पनि कमजोर मानिएको नेपालविरुद्ध युवा खेलाडी उतार्ने योजना बनाएको छ । यसअघि समेत अष्ट्रेलियाले युवा खेलाडीलाई अवसर दिएको थियो । अष्ट्रेलियाले चाईनिज ताईपेविरुद्ध समेत दुबै लेगमा युवा खेलाडीलाई अवसर दिएको थियो ।
नेपाल र अष्ट्रेलियाबीच विश्वकप छनोट अन्तर्गत नै २०१९ अक्टोबर १० मा प्रतिस्पर्धा भएको थियो । अष्ट्रेलियाको क्यानबेरास्थित जीआईओ मैदानमा भएको पहिलो लेगको भेटमा नेपाल घरेलु टिमसँग ५–० ले पराजित भएको थियो । पहिलो हाफमा ३–० ले पछि परेको नेपाल दोस्रो हाफमा थप दुई गोल खान पुगेको थियो ।
अष्ट्रेलियाका जेमी म्याक्लारेनले ह्याट्रिक गरेका थिए । यस्तै युवा डिफेण्डर ह्यारी साउटरले डेब्यु खेलमै दुई गोल गरेका थिए ।
क्यानबेरामा नेपाली टिमले स्विडिस प्रशिक्षक योहान कालिनको नेतृत्वमा खेलेको थियो । यस पटक भने नेपाली टिम कुवेती नागरिक अब्दुल्लाह अलमुताईरीले हेरिरहेका छन् । त्यसबीचमा भने नेपाली टिम बालगोपाल महर्जनले हेरेका थिए ।
प्रशिक्षक कालिनबाट अब्दुल्लाहसम्म आईपुग्दा नेपाली टिममा समेत धेरै परिवर्तन भएको छ । अनुभवी तथा सिनियर खेलाडीलाई प्रशिक्षक अब्दुल्लाहले परिवर्तन गरेका छन् । उनले विगतको लागि भन्दै युवा खेलाडीलाई यस पटक अवसर दिएका हुन् ।
औषत २३ दशमलब ४७ उमेरका खेलाडीमा कप्तान किरणसहित रोहित, नवयुग श्रेष्ठ र विशाल राईमात्रै बढी उमेरका खेलाडी हुन् ।
पहिलो लेगमा नेपालको रक्षापंक्तिमा दिनेश राजवंशी, अनन्त तामाङ, रञ्जित धिमाल र देवेन्द्र तामाङ रहेका थिए । यतिबेला रक्षापंक्तिमा रहेका रोहित चन्दले अष्ट्रेलियासँगको पहिलो लेगमा मिडफिल्डको भूमिका निभाएका थिए । त्यस्तै मिडफिल्डमा रोहित चन्दसँगै विशाल राई, अन्जन बिष्ट, सुजल श्रेष्ठ र रवि शंकर पासवानले पनि सुरुवात गरेका थिए । स्ट्राइकरको भूमिकामा भने अभिषेक रिजाल रहेका थिए । दोस्रो हाफमा सन्तोष तामाङ, तेज तामाङ र विमल घर्तीमगर मैदान छिरेका थिए ।
अष्ट्रेलियाविरुद्धको पहिलो लेग खेल्ने टोलीमा रहेका १२ जना खेलाडी यस पटकको टोलीमा छैनन् ।
त्यतिबेला टोलीमा रहेका देवेन्द्र तामाङ, रञ्जित धिमाल, सुजल श्रेष्ठ, रवि शंकर पासवान, विमल घर्तीमगर (हाल चोटका कारण कतारमा उपचाररत), सरोज दाहाल, विक्रम लामा, विशाल श्रेष्ठ (गोलरक्षक), हेमन गुरुङ (हाल अष्टे«लिया) , विकेश कुथु (गोलरक्षक), तेज तामाङ र अजित भण्डारी टोलीमा छैनन् ।
देवेन्द्र, रञ्जित, सुजल, विमल, विक्रम र तेज चोटग्रस्त छन् भने हेमन देश बाहिर छन् । अन्यले भने टोलीमा आफ्नो स्थान बनाउने मौका पाएनन् । पहिलो लेगमा सुरुवाती–११ मा रहेका ४ खेलाडी यतिबेला टोलीमा छैनन् । सुजल, देवेन्द्र, रञ्जित र रवि शंकरले अष्ट्रेलियाविरुद्धको पहिलो लेगमा सुरुवाती–११ मा रहेका थिए ।
-1752846588.jpeg)
