अर्जेन्टिनाले कोपा अमेरिका खेल्ने पक्का

एजेन्सी । अर्जेन्टिनाले ब्राजिलमा आयोजना हुने कोपा अमेरिका फुटबलमा सहभागिता जनाउने पक्का भएको छ ।

अर्जेन्टिना फुटबल एसोसियन (एएफए) ले कोपा अमेरिका फुटबलमा सहभागिता जनाउने पुष्टि गरेको छ ।

'अर्जेन्टिनाको राष्ट्रिय टिमले कोपा अमेरिका-२०२१ मा सहभागिता जनाउने छ । एस्ले इतिहासमा खेल भावनालाई झल्काउने छ,' एएफएले निकालेको विज्ञप्तिमा भनिएको छ ।

पछिल्लो समय खेलाडीहरु प्रतियोगिताको विपक्षमा देखिएपछि कोपा अमेरिका आयोजना अन्योलमा रहेको छ । जसको कारण अर्जेन्टिनाको सहभागिता समेत अन्योलमा रहेको थियो ।

आयोजक राष्ट्र ब्राजिलका कप्तान कासिमिरोसहित अन्य देशका खेलाडीहरु कोपा आयोजनाको विरोधमा देखिएका छन् । लुइस स्वारेज, एडिन्सन काभानी,जुवान क्वाड्राडो लगायतका खेलाडीहरु कोपा रोक्नुपर्ने पक्षमा रहेका छन् ।

कोरोना महामारीको समय स्वास्थ्यलाई प्राथमिकता दिनु पर्ने उनीहरुको माग रहेको छ ।

कोरोनाकै कारण यस संस्करणको प्रतियोगिता ब्राजिलमा सारिएको हो । यस अघि कोपा अमेरिका अर्जेन्टिनामा आयोजना हुने तय थियो ।

कोरोना भाईरसको महामारीकै कारण सन् २०२० मै आयोजना हुनुपर्ने कोपा अमेरिका दक्षिण अमेरिकी फुटबलको सर्वोच्च निकाय (कन्मेबोल) ले एक वर्ष पछि सारेको हो ।

प्रतियोगिता जुन १३ देखि जुलाई १० सम्म हुने तालिका रहेको छ ।

उद्घाटन खेलमा ब्राजिल र भेनेजुएलाबीच प्रतिस्पर्धा हुने तय छ ।