काठमाडौं । नवनियुक्त युवा तथा खेलकुद मन्त्री एकवाल मियाँलाई राष्ट्रिय खेलकुद परिषदका बोर्ड सदस्यले आईतबार बधाई तथा शुभकामना दिएका छन् ।
राखेपका निमित्त सदस्य सचिव पुरेन्द्र बिक्रम लाखे नेतृत्वको टोलीले मियाँलाई भेट गरि सफल कार्यकालको बधाई तथा शुभकामना दिएको हो ।
कार्यक्रममा मन्त्रालयका सचिव केदार न्यौपाने समेत उपस्थित थिए ।
राखेपका बोर्ड सदस्यहरुले नयाँ आर्थिक वर्षको बजेट निर्माणमा आफुलाई थाहा नभएको, राष्ट्रिय खेलकुद विकास ऐन २०७७ अनुसारको नियमावली रोकिएको र राखेपको बोर्ड बैठक अहिलेसम्म बस्न नसकेको भन्दै नयाँ मन्त्री समक्ष गुनासो गरेका थिए ।
उनले मन्त्रालयका कामबारे मन्त्रीलाई ब्रिफिङ गर्दै खेलहरुको प्राथामिकता निर्धारण, राष्ट्रिय संघको सवलिकरण र पदक सम्भावना भएका खेलको तयारीका विषयमा विशेष गृहकार्य गर्न आवश्यक रहेको बताएका थिए । मन्त्रालयका सचिव न्यौपानेले कर्मचारी नियमावलीको प्रस्ताव राखेपबाट नआउँदा कर्मचारी समायोजनको प्रक्रिया रोकिएको बताए । उनले नियमावली प्रस्ताव गर्न राखेपले ढिलाई गरेको भन्दै मन्त्री समक्ष गुनासो पोखेका थिए ।
बोर्ड सदस्य रिम रानाभाटले नियमावली बनाएको लामो समय बितिसक्दा समेत कार्यान्वयनमा नआएको भन्दै गुनासो पोखेका थिए । उनले नियमावलीको फाईल थन्किएको भन्दै कर्मचारी समयोजन लगायतका काम अघि बढ्न नसकेको उल्लेख गरे ।
अर्का बोर्ड सदस्य गोबिन्द भट्टराईले महत्वपुर्ण घडीमा नयाँ खेलकुद मन्त्रीको आगमन भएको उल्लेख गर्दै नवौं राष्ट्रिय खेलकुद र आसन्न साग खेलकुदको तयारीमा जुट्नुपर्ने बताएका थिए । उनले नियमावली पारित नहुँदा कर्मचारी समायोजन र राखेपको स्रोत साधन बाँडफाँटको काम अघि बढ्न नसकेको उल्लेख गर्दै नयाँ खेलकुद मन्त्रीबाट नेतृत्वदायी भुमिकाको अपेक्षा गरेका थिए ।
निमित्त सदस्य सचिव पुरेन्द्र लाखे सहित सम्पुर्ण राखेप बोर्ड सदस्यले नव नियुक्त खेलकुद मन्त्रीलाई बधाई तथा सफल कार्यकालको शुभकामना व्यक्त गरेका थिए ।
नवनियुक्त खेलकुद मन्त्री मियाँले रोकिएका काम तत्काल अघि बढाउन आफु सकारात्मक रहेको बताए । उनले आफुले अध्ययन गरेर सबैको सल्लाहमै अघि बढ्ने प्रतिबद्धता व्यक्त गरेका थिए । उनले राखेपको सम्पुर्ण टिम मिलेर अघि बढ्नु पर्ने उल्लेख गर्दै रोकिएका कामलाई यथास्रिघ अघि बढाउने बताएका थिए ।
लाखे नेतृत्वका टोलीमा राखेप कार्यकारी समिति सदस्य नन्दा बस्याल, बोर्ड सदस्यहरु सुभास श्रेष्ठ, चन्द्रबदना राई, सुवर्णा श्रेष्ठ, गोबिन्द भट्टराई, रेणुका श्रेष्ठ, रिम रानाभाट उपस्थित थिए ।
