बार्सिलोना, रियल र युभेन्ट्समाथि अनुसन्धान सुरु

एजेन्सी । युरोपियन फुटबलको सर्वोच्च निकाय यूईएफएले विवादास्पद प्रतियोगिता युरोपियन सुपर लिग (ईएसएल) को विषयमा तीन क्लबमाथि अनुसन्धान सुरु गरेको छ ।

यूईएफएले सुपर लिगको संस्थापक क्लब मध्येका बार्सिलोना, रियल मड्रिड र युभेन्ट्समाथि अनुसन्धान सुरु गरेको हो ।

यूईएफएले बुधबार एक विज्ञप्ति निकाल्दै अनुसन्धानको लागि छानविन समिति गठन गरिएको जनाएको छ ।

युरोपका १२ क्लबले आफ्नो नेतृत्वमा रहने गरि युरोपियन सुपर लिगको घोषणा गरेका थिए ।

तर, चौतर्फी दबाब र विरोध आएपछि ९ क्लबले प्रतियोगिताबाट नाम फिर्ता लिईसकेका छन् ।

प्रिमियर लिगका म्यानचेस्टर सिटी, म्यानचेस्टर युनाईटेड, आर्सनल, चेल्सी, लिभरपुल, टोटेनहम, स्पेनका एट्लेटिको मड्रिड, इटालीका इन्टर मिलान र एसी मिलानले भने नाम फिर्ता लिएका थिए ।

बार्सिलोना, रियल र युभेन्ट्स भने अझै प्रतियोगिताको पक्षमा रहेको छ ।

रियलका अध्यक्ष समेत रहेका फ्लोरेन्टिनो पेरेजको अध्यक्षतामा प्रतियोगिताको घोषणा भएपछि फिफा र यूईएफएले प्रतियोगिता रोक्न दबाब दिदै आईरहेको छ ।

यूईएफएले प्रतियोगिता खेल्ने टिमका खेलाडीलाई अन्तराष्ट्रिय फुटबलमा प्रतिबन्ध लगाउने बताईसकेको छ ।

यस्तै सिरी 'ए' ले युभेन्ट्सलाई लिगमा प्रतिबन्ध लगाउने चेतवानी दिईसकेको छ ।