काठमाडौं । राष्ट्रिय योजना आयोगले नयाँ आर्थिक वर्षका लागि युवा तथा खेलकुद मन्त्रालयलाई १ अर्ब ९३ करोड ९५ लाख रुपैयाँको बजेट सिलिङ तोकेको छ ।
नयाँ आर्थिक वर्षका लागि बजेट निर्माणमा रहेको सरकारले युवा तथा खेलकुद मन्त्रालयलाई बजेट सिलिङ तोकेको हो ।
यस वर्षको बजेट सिलिङ गत वर्ष भन्दा १० करोड बढेर आएको हो ।
योजना तथा बजेट निर्माणमा रहेका मन्त्रालयका एक अधिकारीले बजेटको समग्र आकार गत वर्षको हाराहारीमा रहेको बताउँदै सिलिङ बजेट अघिल्लो वर्षभन्दा केही बढेर आएको बताए ।
‘ठुलो महत्वपुर्ण आयोजना छैनन् । कोभिडका कारण नवौं राष्ट्रिय खेलकुदको टुङ्गो छैन । केही मन्त्रालयको सिलिङ अर्ब रुपैयाँ घटेर आएको छ । गत वर्ष १ अर्ब ७६ करोड रुपैयाँ सिलिङ पाएको मन्त्रालयमा १० करोड बढेर आउनु सकारात्मकनै मान्नुपर्छ ।’ उनले खेलपाटीसंग भने ।
सरकारले गत वर्ष २ अर्ब ३६ करोड रुपैयाँको बजेट विनियोजन गरेको थियो । आर्थिक वर्ष २०७६÷७७ मा सरकारले युवा तथा खेलकुदमा ३ अर्ब ९९ करोड रुपैयाँ बजेट विनियोजन गरेको थियो । तुलनात्मक रुपमा गत वर्षको बजेट घटेर आएको थियो ।
सरकारले १ अर्ब ९३ करोड ९५ लाख रुपैयाँको बजेट सिलिङ प्राप्त गरेपनि युवा तथा खेलकुद मन्त्रालयको झण्डै १ अर्ब रुपैयाँ प्रशासनीक खर्च हुँदै आएको छ । बाँकी बजेट भने स्काउट, युवा परिषद्, स्वरोजगार कोष, मन्त्रालयका कार्यक्रममा खर्च हुने गरेको छ । गत वर्ष खेलकुदतर्फ करिब ४० करोड रुपैयाँ मात्र पुर्वाधार निर्माणका लागि बजेट बिनियोजन गरिएको थियो ।
सरकारले नयाँ आर्थिक वर्षमा समेत युवा तथा खेलकुद मन्त्रालयका पुरानै कार्यक्रम तथा योजनालाई निरन्तरता दिने देखिएको छ ।
ओलीको गृहजिल्लामा रंगशाला
सरकारले प्रधानमन्त्री केपी ओलीको गृह जिल्ला झापामा मदनभण्डारी रंगशाला निर्माणलाई नयाँ आर्थिक वर्षको बजेटमा राख्ने भएको छ । अर्थमन्त्रालयले रंगशालाका निर्माणका लागि नयाँ आर्थिक वर्षमा स्रोत सुनिश्चितता गरिदिने भएको हो ।
खेलकुद मन्त्रालय स्रोतका अनुसार झापामा मदन भण्डारी रंगशाला निर्माणमा अर्थ मन्त्रालयले बहुवर्षिय योजनाको रुपमा ५ अर्बको स्रोत सुनिश्चितता गरिदिने भएको हो ।
आदिवासी रंगशालामाथि घात
झापाको कमल गाउँपालिकामा आदिवासीको समाधी स्थल रहेको थियो । आदिवासीको नाममा रंगशाला बनाउने भन्दै सरकारले वडा नम्बर ५ मा रहेको ९ सय ५० भन्दा बढी आदिवासीको चिहान भत्कायो ।
एमाले सत्ता साझेदार रहेको कांग्रेस नेतृत्वको सरकारले ७२ सालमा मदन भण्डारी रंगशालाको नाममा बजेट विनियोजन गर्यो । सरकारी कदमको स्थानीयले विरोध गरे । रंगशाला निर्माणको काम अघि बढेन सकेन ।
सयौं आदिवासीको हाडखोर भत्किएको स्थान भएकाले आदिवासीको नाममा रंगशाला बन्नुपर्ने स्थानीयको माग छ । तर प्रधानमन्त्री समेत रहेका एमाले अध्यक्ष केपी ओली मदन भण्डारी राष्ट्रको नेता भएका कारण मदन भण्डारीको नामबाट रंगशाला बन्नुपर्ने जिकिर गर्दै आएका थिए । लामो विवादले रंगशाला निर्माणको काम अघि बढ्न सकेकाे थिएन ।
प्रधानमन्त्री ओलीले झापामै मदन भण्डारी रंगशाला बनाउने योजना सहित स्थान परिवर्तन गरेका छन् । नयाँ रंगशाला निर्माणका लागि झापाको दमक वडा ३ हम्सेदुम्से सामुदायी बनमा १९ सय बढी रुख ढालेर मदन भण्डारी रंगशाला बनाउने सरकारको तयारी छ । सोही रंगाशालालाई बहुवर्षिय रुपमा स्रोत सुनिश्चितता गरे सरकारले नयाँ आर्थिक वर्षबाट बजेट विनियोजन गर्ने तयारी गरेको छ ।
