‘सुपर सब्टिच्युट’ दर्शन
काठमाडौं । भरपर्दा र परिपक्क मानिएका प्रभावशाली फिनिसर ओलादिपो ओलावाले आफिज पहिलो हाफको ३७ मिनेटमै चोट बोक्दै मैदान छाडे ।
खेल गत बुधबारको हो । धनगढीको प्लेअफमा पुग्ने लक्ष्य सहित पोखरा थण्डर्सविरुद्ध खेलिरहेको थियो ।
यसअघि पहिलो खेललाई छाडने हो भने आफिजले तीन खेलमा लगातार ४ गोल गरेका थिए । मैदान छाड्नु अघि आफुलाई समाल्ने प्रयास गरेका आफिजले खेल्न नसक्ने निर्णय गरे । आफुलाई परिवर्तन गर्न टिम अफिसियलाई आग्रह गरे ।
नेपाल सुपर लिग (एनएसएल)मा प्लेअफ पुग्न धनगढी एफसी मात्र एक जित टाढा थियो । तर महत्वपूर्ण मानिएका फिनिसरनै चोट बोकेपछि धनगढी दबाबमा आयो ।
मैदानमा रहेका स्ट्राइकरद्वय सन्जोक राई र निशान लिम्बुले सोचेअनुसार प्रदर्शन दिन सकिरहेका थिएनन् । उनीहरुलाई राईट विंगर बुद्ध बल तामाङले समेत राम्रो सपोर्ट गरिरहेको देखिदैन थियो ।
बेन्चमा रहेका दर्शन गुरुङ समेत घाईते भएका कारण आराम लिन चाहन्थे । उनी पाँचौ चरणको खेलमा बेन्चमा थिए । यसअघि सुरुवाती सेटमा रहेर खेलको सुरुवात गरेका दर्शन ओलावालेको चोटको संकेत पाउने बित्तिकै वार्म अपका लागि तयार रहे ।
अघिल्लो खेलमा चितवनविरुद्ध घुँडा मुनि सामान्य चोट बोकेर बेन्चमा बसेका दर्शनले सुपर सब्टिच्युट हुँदै दर्शनीय गोल गरे ।
खेलको ३७ औं मिनेटमा मैदान प्रवेश गरि ६८ औं मिनेटमा गोल गरेका दर्शन त्यसपछि समेत खेलमा हाबी भैरहेका थिए ।
पोखराका खेलाडीले क्लियर गर्न नसकेको अवस्थामा करिब २५ यार्ड नजिक रहेका दर्शनले भली गोल गरे । उनको प्रहार पोखराका गोलरक्षक दिप काकीले ठम्याउन सकेनन् । दिप अघि बढेको अवस्थाको फाइदा उठाउँदै दर्शनले दर्शनीय गोल गरेका थिए ।
दर्शनको एक मात्रै निर्णायक गोलले धनगढी एफसी पोखरा थण्डर्सलाई पराजित गर्दै प्रतियोगिताको प्लेअफमा पुग्ने पहिलो टोली भयो ।
लिगमा पहिलो गोल गरेका १८ बर्षिय दर्शनले ‘सुपर सब्टिच्युट’ अघि आफुले गोलनै गर्छु भन्ने मनमा नलागेको बताए ।
‘चोट थियो । गोलनै गर्छु भन्ने चाँही थिएन,’ खेलपछि खेलपाटीसँग बोल्दै उनले भने ।
जितसँगै धनगढी शीर्ष स्थानमा समेत उक्लिएको थियो । प्लेअफमा स्थान सुरक्षित गरेको उसको ५ खेलबाट १० अंक रहेको छ । धनगढीले तीन जित एक बराबर र एक हार ब्यहोरेको छ ।
‘गोल भैरहेको थिएन । हामीले विपक्षीको पोष्टमा अट्याक गरिरहेका थिएनौं । मैदान छिरेर धेरै भन्दा धेरै आक्रमण गर्छु भन्ने थियो । सोहि अनुसार खेले र गोल पनि भयो ।’ खेलपछि हसिलो मुद्रामा देखिएका इलामेली खेलाडीले भने ।
गोल अघि दर्शनले करिब २० यार्डबाट प्रहार गरेको बल गोलरक्षक दिप कार्कीलाई लाग्दै रिबाउण्ड आएको थियो । यद्यपि सो बल कार्कीले आफ्नो नियन्त्रणमा लिएका थिए ।
यसअघि ए श्रेणीका यी खेलाडीलाई अक्सनमा कुनै पनि टोलीले बिट लगाएको थिएन । तर अन्तिम समयमा कोटा खाली भएसँगै धनगढी एफसीले ‘विस लिष्ट’बाट दर्शनलाई टोलीमा लिएको हो ।
एन्फा एकेडेमीका उत्पादन दर्शनले उमेर समूह हुँदै राष्ट्रिय टोलीबाट समेत डेब्यु गरिसकेका छन् । यसअघि कार्तिकमा बंगलादेश भ्रमण क्रममा दर्शनले राष्ट्रिय टोलीबाट डेब्यु गरेका हुन् ।
प्रशिक्षक बाल गोपाल महर्जनको प्रशिक्षणमा ढाका पुगेको नेपालले दुई मैत्रीपूर्ण खेलमा क्रममा दर्शनले डेब्यु अवसर पाएका थिए । प्रशिक्षक महर्जनले बंगलादेविरुद्ध १-० ले पछि परेको स्थितीमा ६९ औं मिनेटमा रवि पासवानको स्थानमा दर्शनलाई डेब्यु गराएको थिए ।
दोस्रो खेलमा भने दर्शनले सुरुवाती एघारमै रहेर ७३ औं मिनेट मैदान बिताएका थिए ।
पछिल्लो एन्फा ब्याजबाट राष्ट्रिय टोलीमा डेब्यु गर्ने एक्ला खेलाडी रहेका दर्शनले थ्री नेसन्स कपमा उपाधि हात पार्दा टोलीका महत्वपूर्ण खेलाडी थिए । उनलाई प्रशिक्षक महर्जनले अट्याकरको भूमिकामा खेलाएका थिए । परिवर्तित खेलाडीको रुपमा दुई खेल खेलेका दर्शनले गोल भने गर्न सकेनन् ।
गत सिजन ए डिभिजन लिगमा न्युरोड टिम एनआरटीबाट खेलेका दर्शनले ३ गोल गरेका थिए । लिग लगत्तै तत्कालिन प्रशिक्षक योहान कालिनले दर्शनलाई पहिलो पटक राष्ट्रिय टोलीको प्रारम्भिक प्रशिक्षण बोलाएका थिए ।
सुपर सब्टिच्युट दर्शनले बाँकी खेलमा समेत उत्कृष्ट प्रर्दशन गर्दै धनगढीलाई उपाधि दिलाउन भूमिका खेल्ने बताए ।
‘चोटको डर पनि छ । अबका खेलमा झनै मेहनत गर्दै धनगढीलाई उपाधि दिलाउन भूमिका खेल्छु ।’ दर्शन भन्छन् ।
अब लिग चरणको अन्तिम खेलमा धनगढीले बुटबल लुम्बिनी एफसीको सामना गर्नेछ ।
