काठमाडौं । नेपाल खेलकुद महासंघले राष्ट्रिय खेलकुद परिषद् (राखेप)का भौतिक संरचनालाई कोरोना महामारीविरुद्धको लडाँईमा प्रयोग गर्न आग्रह गर्दै युवा तथा खेलकुद मन्त्रीलाई ज्ञापन पत्र बुझाएको छ ।
महासंघको पदाधिकारी टोलीले बिहिबार युवा तथा खेलकुद मन्त्रालयमा पुगेर राखेपको रंगशाला, तालिम केन्द्र, होस्टेल, कभर्ड हल जस्ता देशभरका भौतिक संरचनालाई कोरोनाको संकटको समयमा सदुपयोग गर्न मन्त्री तामाङसंग आग्रह गरेको हो ।
महासंघका अध्यक्ष रमेश पौडेल, वरिष्ठ उपाध्यक्ष पर्शुराम बस्नेत, प्रथम उपाध्यक्ष गोबिन्द भट्टराई, उपाध्यक्ष सुभास श्रेष्ठ, महासचिव मेघराज पौडेल सहितको टोलीले खेलकुदमन्त्रीलाई भेट गरि ६ बुँदे ज्ञापनपत्र समेत बुझाएको छ ।
महासंघले त्रिपुरेश्वरस्थित राखेपको नयाँ प्रशासनिक भवनलाई क्वारेन्टाईनको रुपमा तुरुन्त सञ्चालन गर्न आग्रह गरेको छ ।
यस्तै, त्रिपुरेश्वरस्थित कभर्डहल र प्याराफिट मुनिका ट्रेनिङ हललाई आईसोलेसन सेन्टरको रुपमा विकास गर्न, पोखरा, हेटौंडा, दाङ, नेपालगञ्ज लगायतका स्थानमा रहेका कभर्डहल र ट्रेनिङ सेन्टरलाई आवश्यकता अनुसार प्रयोग गर्न र विभिन्न खेल सञ्चालन हुने ईन्डोर हललाई समेत प्रयोगको व्यवस्था मिलाउन आग्रह गरेको छ ।
महासंघले कोरोनाको जोखिमपुर्ण अवस्थामा खेलाडी र खेलकर्मीका परिवारलाई तत्काल राहत सहयोगका लागि प्याकेज घोषणा गर्न, आवश्यक परेका खेलाडीको उपचार र पुर्नस्थापना गर्ने कुरामा पहलकदमी लिन खेलकुद मन्त्रीसंग माग गरेको छ ।
यस्तै महासंघले संकटको घडीमा राखेपमा कार्यरत स्वयंमसेवक, प्रशिक्षक, प्रशासनिक कर्मचारी, पदाधिकारी, विभिन्न खेलका राष्ट्रिय संघ सम्वद्ध पदाधिकारीलाई परिचालन गर्न आग्रह गरेको छ ।
महासंघका अध्यक्ष रमेश पौडेलले कोरोनाको संक्रमण बढेसंगै आवश्यक पुर्वाधारको अभाव भएकाले खेलकुद क्षेत्रका संरचनालाई प्रयोग गर्न मन्त्री तामाङ समक्ष आग्रह गरेका थिए ।
महासचिव मेघराज पौडेलले खेलकुदको नेतृत्व गर्ने संस्था भएको हिसाबले खेल र खेलकुदलाई जोगाउने दायित्व आफुहरुको रहेको उल्लेख गर्दै कठिन अवस्थामा खेलकुद र खेलाडीलाई जोगाउन लाग्नुपर्ने बताएका थिए ।
मन्त्री तामाङले कोरोनाका कारण खेलकुद गतिविधि बन्द रहेको अवस्थामा भौतिक संरचनालाई क्वारेन्टाईन र आईसोलेसनको रुपमा सदुपयोग गर्न मन्त्रालय तयार रहेको बताएका थिए । उनले ज्ञापन पत्र बुझ्दै महासंघको आग्रह अनुसार अघि बढ्ने प्रतिबद्धता जनाएका थिए ।
-1751597995.webp)
