काठमाडौं । काठमाडौं रेजर्स पहिलो संस्करणको फ्रेन्चाईज फुटबल प्रतियोगिता नेपाल सुपर लिग (एनएसएल) को प्लेअफमा प्रवेश गरेको छ ।
बिहीबार भएको रोमान्चक खेलमा विराटनगर सिटी एफसीलाई ५-४ गोल अन्तरले पराजित गर्दै काठमाडौंले प्लेअफमा स्थान पक्का गरेको हो ।
त्रिपुरेश्वरस्थित दशरथ रंगशालामा काठमाडौंलाई जित दिलाउन मेसौके ओलोमोउले ह्याट्रिक गोल गरे ।
यस्तै स्टेफेन बिनोङ र छिरिङ गुरुङले एक एक गोल गरे ।
विराटनगरका पेड्रो मान्जीले दुई गोल फर्काए । यस्तै एडिलाजा सोमिडे र रन्जित धिमालको नाममा एक एक गोल रह्यो ।
प्रतियोगिताकै रोमान्चक खेलमा दुई गोलको अग्रता उल्टाएर काठमाडौंले उत्कृष्ट जित निकालेको हो ।
खेलको छैटौं मिनेटमा एडिलाजा सोमिडेले गोल गर्दै विराटनगरलाई अग्रता दिलाए । कप्तान रन्जित धिमालको लामो क्रसमा एडिलाजाले फ्लिक गर्दै उत्कृष्ट गोल गरेका थिए ।
खेलको १६ औं मिनेटमा पेनाल्टी क्षेत्रभित्र रहेका विराटनगरका पेड्रो मान्जीको एक्रोब्याटिक प्रहार पोस्टको माथिबाट बाहिरिएको थियो ।
खेलको २५ औं मिनेटमा विराटनगरका सुनिल बलको कडा प्रहार काठमाडौंका गोलकिपर विकेश कुथुले पन्च गर्दै बल बाहिर फालेका थिए ।
३३ औं मिनेटमा पेड्रोले गोल गर्दै विराटनगरको अग्रता दोब्बर बनाए । उनले सन्तोष तामाङको लामो पासमा बल अगाडी बढाउदै काठमाडौंका गोलकिपर विकेशलाई बिट गर्दै गोल गरे ।
तर, खेलको ३५ औं मिनेटमा मेसौके ओलोमोउले गोल गर्दै काठमाडौंलाई २-१ को स्थितिमा ल्याए । उनको प्रहार विराटनगरका गोलकिपर किशोर गिरिलाई लाग्दै गोल भएको थियो ।
त्यसको एक मिनेट नबित्दै मेसौकेले व्यक्तिगत दोस्रो गोल गर्दै काठमाडौंलाई २-२ को बराबरीमा ल्याए । उनले मैदानको बायाँ भागबाट क्रस गरेको एयर बल सिधै पोस्ट भित्र छिरेको थियो ।
खेलको ४१ औं मिनेटमा स्टेफेन बिनोङले गोल गर्दै काठमाडौंलाई ३-२ को अग्रता दिलाए । पेनाल्टी क्षेत्र बाहिरबाट पाएको फ्रिकिकमा स्टेफेनले उत्कृष्ट गोल गरे ।
यस्तै पहिलो हाफको इन्जुरी समयमा मेसौकेको क्रसमा संजोक राईको हेडर बाहिरिएको थियो ।
खेलको ५२ औं मिनेटमा विराटनगरका अशोक थापाले गोलको अवसर गुमाए । वान भर्सेस वानको स्थितिमा अशोकको प्रहार काठमाडौंका गोलकिपर विकेशले उत्कृष्ट बचाऊ गरे ।
६६ औं मिनेटमा काठमाडौं प्रिजेन तामाङको क्रसमा स्टेफेनको प्रहार आकाशिएको थियो ।
खेलको ६८ औं मिनेटमा मेसौकेले ह्याट्रिक पूरा गर्दै काठमाडौंलाई ४-२ को अग्रता दिलाए । बायाँ कर्नरबाट विराटनगरका डिफेन्डर दिवाकर चौधरीलाई बिट गर्दै अगाडी बढाएको बललाई उनले गोलमा परिणत गरे । करिब ६ यार्डबाट उनले प्रहार गरेको बल दोस्रो बारको टप कर्नरमा लाग्दै पोस्ट भित्र पसेको थियो ।
मेसौके जारी प्रतियोगितामा ह्याट्रिक गर्ने पहिलो खेलाडी समेत बनेका छन् ।
७३ औं मिनेटमा प्रिजेन तामाङको प्रहार विराटनगरका डिफेन्डरको खुट्टामा डिफ्लेक्ट हुँदै बाहिरिएको थियो । त्यसको एक मिनेट नबित्दै स्ट्राइकर स्टेफेनले पेनाल्टी क्षेत्रको मध्ये भागबाट प्रहार गरेको बल पोस्ट बारमा लाग्दै फर्किएको थियो ।
७९ औं मिनेटमा विराटनगरका कप्तान रन्जित धिमालले गोल गर्दै खेललाई ४-३ को अवस्थामा ल्याए । उनले मध्ये भागबाट अगाडी बढाउदै प्रहार गरेको बल पोस्टको दायाँ बारमा लाग्दै गोलमा परिणत भएको थियो ।
तर, ८३ औं मिनेटमा छिरिङ गुरुङले गोल गर्दै काठमाडौंलाई ५-३ को अग्रता दिलाए । उनले मेसौकेले दिएको बललाई एक्लै अगाडी बढाउदै उत्कृष्ट गोल गरे ।
त्यसपछि खेलको इन्जुरी समयमा पेड्रोले व्यक्तिगत दोस्रो गोल गर्दै विराटनगरलाई ५-४ को स्थितिमा ल्याए । रन्जितको क्रसमा एडिलाजाले दिएको पासमा पेड्रोले गोल गरे ।
तर, पेड्रोको गोलले विराटनगरको हार भने जोगाउन सकेन ।
खेलमा काठमाडौंका मेसौके प्लेयर अफ दि म्याच चुनिए । उनले २५ हजार प्राप्त गरे ।
इमर्जिङ प्लेयर अफ दि म्याच काठमाडौंका विश्वास श्रेष्ठ चुनिए । उनले १० हजार प्राप्त गरे ।
जितसँगै काठमाडौंले ५ खेलमा १० अंक जोडेको छ । काठमाडौं दोस्रो स्थानमा समेत उक्लिएको छ ।
यससँगै काठमाडौं प्लेअफमा पुग्ने दोस्रो टिम बनेको छ । यस अघि धनगढी प्लेअफ पुगिसकेको छ ।
विराटनगरले ५ खेलमा ७ अंक जोडेको छ । विराटनगर तेस्रो स्थानमा रहेको छ ।
विराटनगरको पनि प्लेअफ सम्भावना रहेको छ ।
