टी-ट्वान्टी विश्वकप युएईमा सर्न सक्ने
एजेन्सी । भारतमा आयोजना हुने भनिएको आईसीसी टी-ट्वान्टी पुरुष विश्वकप क्रिकेट प्रतियोगिता युएईमा सर्न सक्ने भएको छ ।
भारतमा कोरोना भाईरसको दोस्रो लहर तीव्र रुपमा फैलिएपछि विश्वकप युएईमा सर्ने सम्भावना बढेको हो ।
विश्वकप आगामी अक्टोबरबाट सुरु हुने तालिका रहेको छ । तर, भारतमा दैनिक १ लाख भन्दा बढी कोरोना संक्रमित देखिन थालेपछि विश्वकप भारतमा हुने सम्भावना कम भएको हो ।
भारतीय क्रिकेटको सर्वोच्च निकाय बीसीसीआई पनि प्लान 'बी' अन्तर्गत विश्वकप युएईमा गराउन राजी भएको बताईएको छ ।
यस अघि बीसीसीआईले विश्वकप आयोजनाका लागि आईसीसीलाई ९ खेल स्थलको प्रस्ताव गरिसकेको छ ।
प्रस्तावित खेल स्थलमा अहमदाबाद, बेंगलुरु, चेन्नई, दिल्ली, धर्मशाला, हैदरावाद, कोलकत्ता, लखनउ र मुम्बई रहेको छ ।
बीसीसीआईका जेनेरल म्यानेजर धिरज मलहोत्राले विश्वकप भारतमै गर्ने प्रयास गरिरहेको तर भारतमा गर्न नसकिएको खण्डमा युएईमा आयोजना गरिने बताएका छन् ।
२०२१ मा आयोजना हुने विश्वकप अक्टोबर देखि नोभेम्बरसम्म हुनेछ ।
विश्वकपमा १६ टिमले प्रतिस्पर्धा गर्नेछन् ।
