एजेन्सी । काराबाओ कप (इएफएल) फुटबलको फाइनलमा आज म्यानचेस्टर सिटी र टोटेनहमबीच प्रतिस्पर्धा हुँदैछ ।
सिटी र टोटेनहमबीचको फाइनल खेल वेम्बलीमा हुनेछ । फाइनल खेल नेपाली समय अनुसार राति ९:१५ बजे सुरु हुनेछ ।
आज दुबै टिम जित निकाल्दै उपाधि उचाल्ने लक्ष्यमा हुनेछन् । त्यसैले दर्शकसहितको फाइनल खेल रोमान्चक हुने अनुमान गरिएको छ ।
सिटी र टोटेनहमबीचको फाइनलमा ८ हजार दर्शकलाई अनुमति दिईएको छ ।
सिटीले ७ पटक काराबाओ कपको उपाधि जितेको छ । यस पटक उपाधि जितेमा सिटीले सर्वाधिक धेरै काराबाओ कप विजेता लिभरपुलसँग बराबरी गर्ने छ ।
लिभरपुलले कीर्तिमानी ८ पटक काराबाओ कपको उपाधि जितेको छ ।
यस्तै टोटेनहमले ४ पटक काराबाओ कप जितेको छ । सिटीलाई हराएर टोटेनहम पाँचौ पटक उपाधि आफ्नो बनाउन चाहन्छ ।
सेमिफाइनलमा सिटीले म्यानचेस्टर युनाईटेडलाई २-० ले पराजित गरेर टोटेनहमसँगको भेट पक्का गरेको हो ।
टोटेनहमले च्याम्पियनसिप क्लब ब्रेन्टफोर्डलाई २-० ले नै पराजित गरेको थियो ।
