काठमाडौं । घरेलु भूमिमा जारी त्रिकोणत्मक टी–ट्वान्टी क्रिकेट सिरिजको फाइनलमा नेपाली राष्ट्रिय क्रिकेट टोलीले शनिबार नेदरल्यान्ड्ससँग प्रतिस्पर्धा गर्दैछ ।
टियू अन्तर्राष्ट्रिय क्रिकेट मैदानमा नेपालले उपाधिका लागि नेदरल्यान्ड्ससँग खेल्नेछ । फाइनल खेल अपरान्ह १:४५ बजे सुरु हुनेछ ।
कोरोना महामारीपछि पहिलो अन्तराष्ट्रिय प्रतियोगिताको फाइनल खेल्न लागेको नेपाल उपाधि जित्ने लक्ष्यमा हुनेछ ।
नेदरल्यान्ड्सविरुद्धको फाइनल अघि खेलपाटीसँग कुरा गर्दै नेपाली टिमका कप्तान ज्ञानेन्द्र मल्लले सिरिज जित्ने प्रयास गर्ने बताए । उनले लामो समयपछि मैदान फर्किदा पनि टोलीको प्रदर्शन उच्च रहेकाले ट्रफी जित्नेमा विश्वस्त रहेको बताए । ट्रफी कप्तानका लागि मात्र नभई टोलीको आत्मविश्वासका लागि पनि अति आवश्यक रहेको उनको भनाई छ ।
‘टोलीको जित नै कप्तानका लागि ठुलो खुसी हो । त्यसमा पनि ट्रफी जित्नु झनै आफैमा खुसीको विषय हो,’ कप्तान मल्ले भने, ‘यसले टिमलाई पनि आगामी दिनमा आत्मविश्वास दिन्छ । व्यक्तिगत रुपमा पनि अन्तर्राष्ट्रिय ट्रफी जित्दा सबै खुसी नै हुन्छौ ।’
कप्तान मल्लले नेदरल्यान्ड्ससँगको फाइनलमा टिममा केहि परिवर्तन हुन सक्ने संकेत समेत दिए । उनले भने, ‘फाइनलमा केही परिवर्तन हुन सक्छ । तर अहिले नै भन्न सक्ने अवस्था छैन । हामी पहिला छलफल गर्छौ । फाइनलमा कसरी जाने, कुन योजनामा जाने भन्ने विषयको छलफल हुन्छ । त्यसपछि मात्रै परिवर्तनको टुङ्गो लगाउँछौ ।’
पहिले ब्याटिङ गर्न अवसर पाए नेपाली टोलीले धेरै भन्दा धेरै रन जोड्ने प्रयास गर्ने उनले बताए । उनले बलिङमा कम बाउन्ड्री र धेरै बल डट गर्ने प्रयास रहने बताए ।
‘हाम्रो बलिङ पनि राम्रो छ । विकेट आए अनुसार मैदान पनि सानो जस्तो लागिरहेको छ,’ उनले भने, ‘ब्याटिङतर्फ मिडिल अडरमा लगातार विकेट गइरहेको छ । अर्को कुरा टी–ट्वान्टीमा डट बल कम गर्नु पर्छ । त्यसपछि अन्मितको दुई ओभरमा बढी रन बटुल्नु पर्छ । हामीले पछिल्लो खेलहरुमा अन्तिमका दुई ओभरमा राम्रो रन बटुल्न सकिरहेका छैनौ ।’
कप्तान मल्ले मैदानको आउट फिल्ड सोचेको जस्तो नभइरहेको बताए । आउट फिल्ड सोचे जस्तो नभएकाले फिल्डर्सहरुलाई अट्याकिङ र डिफेन्स गर्ने विषयमा दुविधा भइरहेको उनले बताए ।
‘आउट फिल्डका कारण अट्किङ गर्दा थम्बल्स हुने सम्भावना पनि प्रवल हुन्छ । त्यसले गर्दा पनि फिल्डिङ राम्रो भइरहेको छैन् । तर, क्याचहरु भइरहेकाले पनि हाम्रो फिल्डिङ त्यस्तो कमजोर छ जस्तो लाग्दैन,’ उनले भने ।
उनले नेपाली ब्याट्सम्यानको अबको योजना अन्तिम ओभरमा बाउन्ड्री हुनु पर्ने बताए । फिनिसिङ ओभरमा कमजोर देखिएको नेपालका लागि सुर्धान आवश्यक रहेको उनले बताए ।
‘हामीले अन्तिम ओभरमा ८–१० रन जोड्नै पर्छ । तर, त्यसो हुन सकिरहेको छैन । यसमा हामी सबैलाई थाहा पनि छ । हामी यसको बारेमा पनि योजना बनाउँदै छौ,’ उनले भने, ‘ अन्तिम ओभरमा जो इस्ट्राइकमा हुन्छ, त्यसले पक्कै पनि त्यो टार्गेट गर्नु पर्छ भन्ने विषयको छलफल गछौ ।’
