काठमाडौं । नेपालमा पहिलो पटक हुन लागेका फ्रेन्चाईज नेपाल सुपर लिग (एनएसएल) बैशाख ११ बाट २५ गतेसम्म आयोजना हुँदैछ ।
दशरथ रंगशालामा आयोजना हुने एनएसएलमा ७ फ्रेन्चाईज टिमले उपाधिका लागि प्रतिस्पर्धा गर्ने छन् ।
आयोजक नेपाल स्पोर्टस् म्यानेजमेन्टले प्रतियोगिताको खेल तालिका समेत सार्वजनिक गरिसकेको छ ।
प्रतियोगिताको उद्घाटनमा उपत्यकाका दुई टिम ललितपुर सिटी र काठमाडौं रेजर्सबीच प्रतिस्पर्धा हुनेछ ।
सहभागी टिमले अक्सनबाट खेलाडी छनोट गरिसकेका छन् । यस्तै फ्रेन्चाईज टिमले विदेशी कोटाको खेलाडी र स्थानीय खेलाडी अनुबन्धन गर्ने क्रम जारी छ ।
पहिलो संस्करणको उपाधि जित्न सहभागी ७ वटै टिम अन्तिम चरणको तयारीमा रहेका छन् ।
सहभागी टिममध्ये एक टोलीले मोफसलमा रहेर प्रशिक्षण गरिरहदा अन्य टोली भने उपत्यकामा प्रशिक्षण गरिरहेका छन् ।
कुन टोलीको तयारी कहाँ ?
विराटनगर सिटी एफसी
बीसीएफका अध्यक्ष समेत रहेका अनुप रन्जन भट्टराईको स्वामित्वमा रहेको विराटनगर सिटीले सुनसरीको धरान एकेडेमीमा तयारी गरिरहेको छ । मार्की खेलाडी रन्जित धिमाल रहेको टोलीले विराट गोल्डकप समापन भएसँगै सोहि मैदानमा रात्रिकालिन प्रशिक्षक गर्नेछ । उसले अक्सनबाट आएका १५ सहित तीन विदेशी र एक स्थानिय खेलाडीलाई प्रशिक्षणमा समावेश गराएको छ । उसको प्रशिक्षकमा भने भारतीय यान ल हुनेछन् ।
बुटबल लुम्बिनी एफसी
राजकुमार तिमल्सिना र भिम प्रसाद तिमल्सिनाको स्वामित्वमा रहेको बुटबल लुम्बिनीको मार्की खेलाडीमा राष्ट्रिय टोलीका सदस्य तथा गोलरक्षक विशाल श्रेष्ठ रहेका छन् । मुख्य प्रशिक्षक सनोज श्रेष्ठ र टोलीको जेनेरल म्यानेजरमा पूर्व खेलाडी तथा प्रशिक्षक राजुकाजी शाक्य रहेका छन् । हाल टोलीले ललितपुरको बुद्धि विकास खेल मैदानमा प्रशिक्षण गरिहेको छ ।
एफसी चितवन
सचिन ढकालको स्वामित्वमा रहेको चितवनले आफ्नो तयारी विभागीय एपीएफ क्लबको हल्चोक मैदानमा तयारी गरिरहेको छ । टोलीको प्रशिक्षकमा मेघराज केसी रहनेछन् भने मार्की खेलाडीमा भरत खवास रहेका छन् । टोलीले दुई विदेशी खेलाडीको रुपमा ईजिप्टका खेलाडीलाई झिकाईसकेको छ ।
काठमाडौं रेजर्स
यामाहाका सिईयो चिरञ्जिबी शाहको स्वामित्वमा रहेको काठमाडौं रेजर्सको प्रशिक्षकमा बालगोपाल महर्जन रहँदा निर्देशकमा विज्ञानराज शर्मा रहेका छन् । यस्तै टोलीको मार्की प्लेयरमा विकेश कुथु रहेका छन् । हाल टोलीले मध्यपुर युथ एसोसिएसनको मैदानमा अभ्यास गरिरहेको छ । क्लबले तीन घानाका खेलाडी ल्याउने तयारी गरेको छ ।
ललितपुर सिटी एफसी
भाटभटेनी सुपर मार्केट अन्तर्गत रहेका ललितपुर सिटी फुटबल क्लबको तयारी हाल ललितपुर जेभियर स्कुलमा भईरहेको छ । यस अघि टोलीले केहि समय पोखरामा रहेर तयारी गरेको थियो । टोलीको प्रशिक्षकमा प्रदिप हुमागाई रहँदा मार्की खेलाडीमा अन्जन विष्ट रहेका छन् ।
पोखरा थण्डर्स
लक्ष्मी ग्रुपका निकाकार श्रेष्ठको स्वामित्वमा रहेको पोखराले हाल पोखरामै रहेर तयारी गरिरहेको छ । टोलीको प्रशिक्षकमा नविन न्यौपाने रहेनेछन् भने मार्की खेलाडीमा स्ट्राइकर नवयुग श्रेष्ठ रहनेछन् । टोलीले तीन विदेशी खेलाडी समेत झिकाईसकेको छ ।
धनगढी फुटबल क्लब
सुवास शाहीको स्वामित्वमा रहेको धनगढीले आफ्नो तयारी जावलाखेल मैदानमा गरिरहेको छ । टोलीले यस अघिनै विदेशी प्रशिक्षक फुजा तोपेलाई झिकाएको छ । यस्तै टोलीको मार्की खेलाडीमा विशाल राई रहेका छन् । टोलीले राष्ट्रिय टिमका कप्तान तथा गोलकिपर किरण चेम्जोङलाई आईकनिक खेलाडीको रुपमा अनुबन्ध गरिसकेको छ ।
-1753270648.jpeg)
