धम्बोझी प्रेसिडेन्ट लिगको शीर्ष दुईमा

नेपालगन्ज । धम्बोझी क्लब लुम्बिनी प्रदेशले एन्फा प्रेसिडेन्ट लिग २०७७ मा शनिबार कर्णालीको लेकाली युवा क्लबलाई ३–१ ले पराजित गरेको छ ।

जितसँगै धम्बोझीले लिगको शीर्ष दुईमा पर्दै राष्ट्रिय लिगका लागि छनोट भएको छ । यस लिगको शीर्ष ४ टोलीले एन्फाले आयोजना गर्ने राष्ट्रिय लिग खेल्न पाउने छन् ।

शनिबार नेपालगन्ज रंगशालामा धम्बोझीको जितमा बिसन गुरुङ, गौरब बुढाथोकी र निसान लिम्बुले एक एक गोल गरे । लेकालीका संजय धिमालले एक गोल फर्काए । खेलमा धम्बोझीका गौरब बुढाथोकी म्यान अफ द म्याच बन्न सफल भए ।

कर्णाली फुटबल संघ उपाध्यक्ष भरत बहादुर खत्रीले पुरस्कृत गरे । धम्बोझीले ६ खेलमा ४ मा जित २ मा हारको सामना गर्दै १२ अंक जोडेको छ । लेकालीले ६ खेलमा ५ मा हार र १ बराबरीमा खेल्दै १ अंकमात्र जोडदै अंक तालिकाको पुछारमा छ । एक खेल अगावै सुदुरपश्चिमको स्टार सिटी युवा क्लब कैलाली १३ अंक सहित लिग च्याम्पियन बनिसकेको छ । गण्डकी प्रदेशको त्रिवेणी युवा क्लब ९ अंक सहित तेस्रो स्थानमा छ ।

आइतबार लिगको अन्तिम दिन स्टार सिटीले त्रिवेणी युवा क्लबसँग प्रतिस्पर्धा गर्नेछ । त्रिवेणीले उक्त खेल जितेपछि हेडटु हेडका आधारमा धम्बोझी शीर्ष दुईमा पर्ने पक्का भएको हो ।

आइतबार लिगको अन्तिम दिनको पहिलो खेलमा सैनिक युवा क्लब झापा र मनकामना युवा क्लब रौतहटबिच प्रतिस्पर्धा हुनेछ । अर्को खेलमा स्टार सिटी र त्रिवेणीबिच प्रतिस्पर्धा हुनेछ ।