काठमाडौं । त्रिदेशीय फुटबल प्रतियोगिताको आफ्नो दोस्रो खेलमा नेपालले आज (शनिबार) बंगलादेशसंग खेल्दैछ ।
काठमाडौंको त्रिपुरेश्वरस्थित दशरथ रंगशालामा साँझ साढे ५ बजे हुने खेलमा नेपाललाई जितको दबाब छ ।
यसअघि आफ्नो पहिलो खेलमा कमजोर मानिएको किर्गिस्तानको ओलम्पिक टोलसँग गोलरहित बराबरीमा रोकिएको नेपाललाई फाइनल पुग्न जितको विकल्प छैन ।
पहिलो खेलमा किर्गिस्तानलाई १–० गोल अन्तरले पराजित गरेको बंगलादेश एक खेल अगावै फाइनल पुगिसकेको छ ।
बंगलादेशको ३ अंक रहँदा नेपाल र किर्गिस्तानको समान १–१ अंक रहेको छ ।
यता, नेपाल बंगलादेशसँग बिना कुनै कार्ड ब्यहोर्दै १–० गोल अन्तरले पराजित भएको खण्डमा समेत फाइनल पुग्नेछ । प्रतियोगिताको नियम अनुसार अंक बराबर भएमा हेड टु हेड लागु हुनेछन । त्यो पनि बराबर भएको अवस्थामा गोल संख्या हेरिनेछ । यदि गोल पनि बराबर भएको खण्डमा भने कार्डको गणना हुनेछ ।
यस्तो समिकरणमा नेपाल फाइनल पुग्नेछ । यसअघि तीन नयाँ खेलाडीलाई सिनियर टोलीमा स्थान दिएका मुख्य प्रशिक्षक बालगोपाल महर्जनले दोस्रो खेलमा केहि परिवर्तन गर्न सक्छन् । त्रिदेभको स्थानमा सुजल श्रेष्ठले अवसर पाउँन सक्छन् ।
यता, बंगलादेशका प्रशिक्षकले पहिलो जित पछिनै टोली फाइनल पुगेको खण्डमा नयाँ खेलाडीलाई अवसर दिने बताएका थिए । पहिलो खेलमा ३ खेलाडीलाई डेब्यु गराएका जेमी डेले नेपालमा ६ नयाँ अनुहार बोकेर आएका छन् ।
यसअघि एक एक खेल खेलेका दुबै टोलीका लागि केहि महत्वपूर्ण खेलाडी रहेका छन् । जसले आज मैदानमा आफ्नो क्षमता देखाउने छन् ।
नेपालका लागि उपकप्तान रहेका रोहित चन्द हेर्न लायक खेलाडी रहनेछन् भने बंगलादेशका लागि पहिलो खेलमा कप्तानी गरेका सोहेल राना महत्वपूर्ण खेलाडी बन्न सक्छन् ।
रोहित चन्द
यसअघि डिफेन्स लाईनमा कमजोर प्रदर्शन गर्दै आईरहेको नेपालका लागि उपकप्तान रोहित चन्दले किर्गिस्तानविरुद्ध मजबुद प्रदर्शन गरे । उनले सम्हालेको रक्षापंक्तिले कुनै पनि समय दबाब झेल्नु परेन ।
ब्यवसायिक फुटबलका लागि एसियाकै उत्कृष्ट मानिने लिग इन्डोनेशियामा खेल्दै आएका उनि पछिल्लो समय मिडफिल्डरमा समेत खेल्दै आएका छन् । २९ वर्षिय परिपक्क डिफेन्डरलाई बिट गर्न बंगलादेशका खेलाडीलाई हम्मे पर्न सक्छ ।
सोहेल राना
पहिलो खेलमा उच्च प्रदर्शन गर्दै म्यान अफ दि म्याच घोषित भएका थिए, कप्तान सोहेल राना । नियमित कप्तान जमल भुयानको अनुपस्थितिमा उनले किर्गिस्तानविरुद्ध कप्तानी गर्दै प्रभावशाली प्रदर्शन गरेका थिए ।
घरेलु लिगमा अवहानी लिमिटेडको प्रतिनिधित्व गर्ने २६ बर्षिय स्ट्राइकर नेपालका लागि बाधक बन्न सक्छन् । बल कन्ट्रोल, ड्रिब्लिङ र बल पोजिसन बनाउन माहिर राना नेपाली डिफेन्डरका लागि टाउको दुखाईको बिषय बन्न सक्छन् ।
-1753017726.jpeg)
