शुन्यमै सन्तुष्ट बालगोपाल

काठमाडौं । थ्री नेशन्स कप अन्तराष्ट्रिय फुटबलको पहिलो खेलमा बिहीबार नेपालले किर्गिस्तानसँग गोलरहित बराबरी खेल्यो ।

विश्वकप छनौटको तयारीमा रहेको नेपालले किर्गिस्तानको यू–२३ टोलिसँग गोलरहित बराबरी खेल्दा प्रशिक्षक बालगोपाल महर्जनमाथी धेरै प्रश्न चिन्ह खडा भए ।

प्रशिक्षक महर्जनले खेलको पूर्व सन्धामा किर्गिस्तानी टोलीको स्तर नेपालभन्दा धेरै तल भएको बताएका थिए । उनले आफ्ना खेलाडीले तयारी अनुरुप प्रदर्शन गरेमा किर्गिस्तानीलाई सहजै हराउँन सक्ने बताएका थिए । तर, नेपाली टोलीले किर्गिस्तानी टोलीमाथी जितको नतिजा निकाल्न सकेनन् ।

मुख्य प्रशिक्षक महर्जनले सुरुवाती-११ मा नयाँ र युवा खेलाडीलाई प्राथमिकतामा राखेका थिए । सुरुवातीमै दुई खेलाडीलाई डेब्यु गराएका थिए । तर, खेलमा नतिजा प्रशिक्षक महर्जनले चाहेको जस्तो आएन ।

डिफेन्स लाइन मजबुद देखिएको नेपाली टिमको मिडफिल्ड र अग्रपंक्ति कमजोर देखिएको थियो । डेब्यु मिडफिल्डर त्रिदेब गुरुङ र संजोक राईमा अनुभवको अभाव प्रस्ट देखिन्थ्यो ।

मिडफिल्डमा बल होल्ड गरेर खेल्न सक्ने क्षमता भएका मिडफिल्डर विशाल राईलाई बेन्चमै राख्नु प्रशिक्षकको कमजोरी रह्यो । जसको कारण मिडफिल्ड र अग्रपंक्तिका खेलाडीबीच उत्कृष्ट तालमेल देखिएन ।

किर्गिस्तानविरुद्ध नेपाली टिमले केहि राम्रो अवसर भने सिर्जना गरेको थियो । तर, त्यो अवसर विंगर र डिफेन्डरको तालमेलबाट सम्भव भएको थियो ।

प्रशिक्षक महर्जन भने पहिलो खेलको नतिजाबाट सन्तुष्ट छन् । उनले यस प्रतियोगितालाई खेलाडीको परिक्षणको रुपमा हेरेको बताए ।

‘विगत तीन महिना देखि मेरो निगरानीमा रहँदै राष्ट्रिय टोलीले प्रशिक्षण लिइरहेको छ । यो तीन मिहनाको अवधिमा हामीले कुनै पनि मैत्रीपूर्ण खेल खेल्ने अवसर पाएका थिएनौ । त्यसैले थ्री नेशन्स कपमा मैले खेलाडी परिक्षण गर्ने अवसर पाएको छु,’ प्रशिक्षक महर्जनले भने ।

महर्जनले किर्गिस्तानसँगको खेलमा नेपाली टोलीको मिडफिल्ड र स्ट्राइकर लाइन कमजोर भएको स्वीकारे ।

‘आजको खेलमा मैले जुन निर्देशन दिएको थिए, खेलाडीले त्यो नियम पालना गरेरै खेलेका छन् । तर, खेल जित्नका लागि स्कोर निस्कनु पर्ने हो । स्कोर समयमा निस्केन्,’ उनले भने, ‘हामीले धेरै अवसरहरु सिर्जना गरेका थियौ । त्यसमा अलिकति कता–कता स्ट्राइकरहरु चुकेको मैले देखेको छु । आगामी खेलमा त्यसलाई सुधारेर राम्रो नतिजा त्याउने म आशा गर्दछु ।’

यस प्रतियोगितालाई खेलाडी परिक्षणको रुपमा हेरेको बताउने महर्जनले नेपाली टोलीमा स्ट्राइकरको अभाव रहदा समेत स्ट्राइकर आषिश लामालाई मौका दिएनन् । गत सिजनको सहिद स्मारक 'ए' डिभिजन लिगको सर्वाधिक गोलकर्ता भएपनि आषिशले मौका नपाएका हुन् ।

विभागिय टोली एपीएफबाट खेल्दै आएका आशिषले गत वर्षको लिगको १३ खेलमा ९ गोल गरेका थिए । लिगका दौरान हेडिङमा सबैभन्दा चुस्त देखिएका आशिष बक्सभित्र पनि त्यति नै चतुर देखिएका थिए । बक्स बाहिरबाट पनि प्रहार गर्न माहिर आशिषलाई यस प्रतियोगितामा भरपूर प्रयोग गर्दै उनको क्षमता मापन गर्ने सुन्दर अवसर थियो । यस प्रतियोगितामा उनको लय मापन गर्दै आउने खेलका लागि राष्ट्रिय टोलीमा आशिषको भविष्य निर्धारण हुन सक्थ्यो । तर, उनी प्रतियोगिताको पूर्व सन्धामा २३ खेलाडी भित्र पर्न सकेनन् ।

किर्गिस्तानसँग वान टच फिनिसिङमा चुकेको नेपालका लागि नवयुग श्रेष्ठ पनि राम्रो विकल्प हुन सक्थे । उनीसँग पेनाल्टी क्षेत्रभित्र वान चट गोल गर्न सक्ने क्षमता छ । तर, उनी पनि प्रशिक्षकको टोलिमा अटाउन सकेनन् ।

महर्जन भने अहिलेको यस टिम नेपालमा उपलब्ध भएको सबैभन्दा उत्कृष्ट टिम रहेको दाबी गर्छन्।

‘मैले जुन खेलाडीलाई स्ट्राइकरको रुपमा ल्याएको छु, जुन सोचेको छु, त्यसमा म सन्तुष्ट छु,’ उनले भने, ‘म यो मिडफिल्डर, यो फरवार्ड भनेर कुरै गर्दिन । मैले अहिले छानेको नेपालको टोली वान अफ दि बेस्ट टिम हो । म सन्तुष्ट छु । अरु अन्तुष्ट होला नहोला म भन्न सक्दिन् ।’

उनले थपे, ‘हामी देख्न सक्छौ, यस खेलमा ५-६ गोलको अग्रता लिनु पर्ने हो । हामीले त्यो अवस्था सिर्जना गरेका पनि थियौ । तर, त्यहाँ हाम्रा खेलाडी चुकेको अवश्य हो । त्यहाँ म्याक्सिमम क्रसिङ पनि नभएका भने हैनन् । त्यो ठाउँमा अलिकती धैयर्ता अपनाउनु पर्ने थियो । खेलाडीमा एग्रेसिभनेस बढी देखियो । यसलाई हामी पछिल्लो खेलमा अवश्य पनि म सुधार्ने छौ ।’

विश्वकप छनोटको तयारीमा रहेको टोली किर्गिस्तानको ओलम्पिक टिमसँग गोलरहित बराबरीमा रोकिनुले नेपाली फुटबल टोलीको स्तर देखाएको छ ।

कोरोनाका कारण केहि देशले बैदेशिक यात्रामा रोक नलगाएको भए यस समय नेपालले दशरथ रंगशालामा विश्वकप छनौटका घरेलु खेल खेल्ने थियो । तर, विश्वकपछनौट खेलिरहेको नेपाली टिमको यस प्रदर्शनबाट धेरै प्रश्न उठेको छ ।

यता प्रशिक्षक महर्जन थ्री नेसन्सको टिम विश्वकप छनौट खेल्ने अन्तिम नभएको बताउँछन् । ‘अहिले दश जना खेलाडी बाहिरिएका छन् । अब त्यो दश जना टिममा आउन पनि सक्छन् । विश्वकपका लागि अझै समय छ । हामी हेर्दै जाने छौ । यो मैत्रीपूर्ण खेल जस्तै हो । यसलाई खेलाडी परिक्षणको रुपमा हेर्नु पर्छ,’ उनले भने ।

प्रशिक्षक महर्जनले युवा खेलाडीलाई टोलीमा राखेर मात्र नहुने प्रतिक्रिया दिए । युवा खेलाडीलाई अवसर दिनु पनि आवश्यक रहेको उनले बताए ।

‘नयाँ खेलाडीलाई पनि अवसर दिनु पर्छ । उनीहरुको पोटेन्सियल देखेरै मैले टिममा राखेको हुँ । आजको टिममा मैले जतिपनि निरिक्षण गरे, उनीहरुको प्रशिक्षणबाट म खुसी छु,’ उनले भने, ‘जसलाई विश्वास गरेर मिडफिल्डमा खेल्न लगाएको थिए, उनीहरुको प्रदर्शनबाट म सन्तुष्ट छु ।’

महर्जनले नतिजा मात्रै नहेर्न आग्रह गरे । उनले नतिजाभन्दा खेलाडीको प्रदर्शन महत्वपूर्ण भएको बताए । गोलभन्दा पनि खेलाडीले बल आफ्नो पक्षमा राख्नुनै राम्रो खेल भएको महर्जनको आशय थियो । उनले भने, ‘तपाइले नतिजा मात्रै हेर्नु हुन्छ कि, खेल पनि हेर्नु हुन्छ ? स्कोर मात्र गर्न नसकेका हुन् । खेल उत्कृष्ट थियो ।’

खेलको ६७ औं मिनेटमा किर्गिस्तानी टोलीका कप्तान टासिभ कामोलिदीन दोहोरो पहेँलो कार्डसहित रातो कार्ड पाएर मैदानबाट बाहिरिदा पाहुना टोली १० खेलाडीमा समेटिएको थियो । नेपालले करिब २९ मिनेट १० खेलाडीमा समेटिएको किर्गिस्तानसँग खेलेको थियो । त्यसमा पनि करिब ५ मिनेट किर्गिस्तान टोली नौ खेलाडीमा सिमित थियो । तर, त्यस्तो अवस्थानमा पनि नेपालले गोल गर्न सकेन् ।

‘हामीले प्रयास नगरेको भने हैनौ । हामी त्यसमा चुक्यौ,’ प्रशिक्षक महर्जनले भने, ‘अबको खेलमा अंक महत्वपूर्ण हो । हामी एक अंक होस वा तीन अंक, अर्को खेलमा जोड्दै फाइनलमा पुग्ने प्रयास गर्ने छौ । किर्गिस्तानसँगको खेलले मेरो टिम, म र मेरा खेलाडीको विश्वास बढेको छ । त्यसैले अर्को खेलमा हामी राम्रो नतिजाको आशा गर्छौ ।’