'गोल गर्न चुक्यौं, अर्को खेलमा सुधार गर्छौं'

काठमाडौं । नेपाली राष्ट्रिय फुटबल टिमका मुख्य प्रशिक्षक बाल गोपाल महर्जनले टिमको प्रदर्शनबाट आफु सन्तुष्ट रहेको बताएका छन् ।

थ्री नेसन्स कप अन्तराष्ट्रिय फुटबलको पहिलो खेलमा किर्गिस्तानको यू-२३ टिमसँग गोलरहित बराबरीमा रोकिएपछि बोल्दै प्रशिक्षक महर्जनले टिमको प्रदर्शनबाट सन्तुष्ट रहेको बताएका हुन् ।

'धेरै पछि खेल्ने मौका पायौं । खेलप्रति सन्तोषजनक छु,' महर्जनले भने ।

यस्तै महर्जनले खेलमा फरवार्ड चुक्दा जितबाट बन्चित भएको बताए ।

'धेरै मौका सिर्जना गरेका थियौं । तर, गोल भएन । फरवार्ड केहि चुकेको जस्तो लाग्यो । आगामी खेलमा सुधार गर्ने छौँ,' उनले भने ।

यस्तै प्रशिक्षक महर्जनले यस टिम नेपालको उत्कृष्ट टिम भएको बताए ।

'अहिले उपलब्ध भएको मध्ये यो उत्कृष्ट टिम हो नेपालको,' महर्जनले भने, 'आजको खेलमा फरवार्ड चुकेकै हो । त्यसमा म सहमत छु ।'

यस बराबरीसँगै नेपालले फाइनल पुग्ने सम्भावना कायम राखेको छ । किर्गिस्तानको समेत फाइनल पुग्ने सम्भावना रहेको छ ।

यस खेलको नतिजाले बंगलादेश भने फाइनल पुगेको छ ।

अब नेपालले दोस्रो खेलमा बंगलादेशसँग खेल्नेछ । नेपाल र बंगलादेशबीचको खेल शनिबार हुनेछ ।

राउण्ड रोबिनको आधारमा हुने लिगको शीर्ष दुई टिमले फाइनलमा प्रतिस्पर्धा गर्ने छन् ।

मुख्य प्रशिक्षक महर्जनले बंगलादेशसँग नतिजा निकाल्ने लक्ष्यसहित मैदान उत्रने बताए ।

'बंगलादेशसँग कसरी हुन्छ राम्रो प्रदर्शन गरेर अंक लिने र फाइनल पुग्ने लक्ष्य रहेको छ,' महर्जनले थपे ।