राजर्षि जनक कप फुटबल चैत २१ बाट

अविनास थापा

सर्लाही । प्रदेश नं २ कै प्रतिष्ठित तथा सर्वाधिक पुरस्कार राशी भएको राजर्षि जनक कप फुटबल प्रतियोगीता चैत्र २१ गतेबाट सुरु हुने भएको छ ।

आयोजक बागमती युवा क्लबले प्रतियोगिता चैत २१ गतेदेखि ३० सम्म आयोजना हुने जनाएको छ ।

क्लबका महासचिव सागर मैनालीले खेलपाटी डटकमसँग कुरा गर्दै पाचौँ संस्करणको प्रतियोगिता सञ्चालनका लागि अखिल नेपाल फुटबल संघबाट चैत २१ गतेदेखि ३० सम्मको मिति पाएको बताए ।

सन्तोष श्रेष्ठ स्मृति खेल मैदानमा सञ्चालन हुने प्रतियोगिता प्रदेश २ कै सर्वाधिक धनराशीको प्रतियोगिता हो ।

प्रतियोगितामा दुई विदेशी टिम, ‘ए’ डिभिजनका क्लब, मोफसलका टिमहरू र आयोजक बागमति यूवा क्वल सहित १० टिमको सहभागिता रहने महासचिव मैनालीले बताए ।

प्रतियोगिताको विजेताले १० लाख १ हजार र उप विजेताले ५ लाख ५ हजार नगद पुरस्कार प्राप्त गर्ने छन् । सर्वोत्कृष्ट हुने सर्लाहीका एक जना खेलाडीलाई १५० सिसिको पल्सर मोटरसाईकल र सर्वोत्कृष्ट खेलाडीलाई ५१ हजार नगद प्रदान गरिने आयोजकले बताएको छ ।

मैनालीले एन्फाले मोफसलका प्रतियोगिताको समय जुधाएको हुनाले यस अघिका संस्करणमा 'ए' डिभिजन क्लबहरुले सहभागीता जनाउन नसकेको बताए ।

यस्तै खल्ती डिजिटल वालेट प्रतियोगिताको आधिकारिक टिकट पार्टनर बनेको छ । प्रतियोगिताको टिकट सहकार्यका लागि खल्ती र आयोजक क्लबबीच सम्झौता समेत भएको हो । खल्ती डिजिटल वालेटको माध्यमबाट टिकट खरिद गर्ने दर्शकहरुले २० प्रतिशत छुट पाउने समेत आयोजक कमिटिले जानकारी दिएको छ ।

बागमति नगरपालिकाको सहकार्यमा क्लबले यस प्रतियोगिताको आयोजना गर्न लागेको हो । ११ दिन सञ्चालन हुने प्रतियोगिता सम्पन्न गर्न भने ९० लाख ८० हजार रुपैयाँ खर्च हुने अनुमान गरिएको क्लबले जनाएको छ ।