एन्फा र मेडिसिटी अस्पतालबीच सम्झौता

काठमाडौं । अखिल नेपाल फुटबल संघ (एन्फा) ले मेडिकल पार्टनरको रुपमा नेपाल मेडिसिटी अस्पतालसँग सम्झौता गरेको छ ।

एन्फाले आइतबार एक कार्यक्रमकाबीच मेडिसिटी अस्पतालसँग एक वर्षे सम्झौता गरेको हो ।

एन्फाको स्वास्थ्य विभाग प्रमुख निरज खड्की र अस्पतालका महाप्रबन्धक विजय रिमालले हस्ताक्षर गरे ।

सम्झौता अनुसार अस्पतालले खेलाडीको स्वास्थ्यलाई ध्यानमा राखी दक्ष चिकित्सक, फिजियोथेरापिष्ट र उच्चस्तरीय उपकरण सहितको स्पोर्टस् मेडिसिन सेवा प्रदान गर्नेछ ।

यस्तै राष्ट्रिय टिमका खेलाडी तथा 'ए', 'बी' र 'सी' डिभिजन लिग खेल्ने खेलाडीको बीमा अस्पतालले गर्नेछ ।

राष्ट्रिय टिम र 'ए' डिभिजनका खेलाडीको ५ लाखको बीमा हुनेछ । 'बी' र 'सी' डिभिजन लिग खेल्ने खेलाडीको बीमा ३ लाखको हुनेछ ।

सम्झौतापछि बोल्दै अस्पतालका महाप्रबन्धक रिमालले खेलाडीसँगै खेलाडीको परिवारलाई समेत सेवा सुविधा उपलब्ध गराउने बताए ।

'हामीले खेलाडीलाई मात्र नभएर खेलाडीका पारिवारलाई पनि सेवा दिने प्रयत्न गर्ने छौँ,' उनले भने, 'हामी सधै खेलकुदसँग छौँ । नेपाली फुटबल खेलाडी र एन्फासँग जोडिन पाउदा खुसी छौँ ।'