जितसँगै सातदोबाटोलाई च्याम्पियन ट्रफी

काठमाडौं । दुई खेल अगाबै च्याम्पियन बनिसकेको सातदोबाटो युथ क्लबले सहिद स्मारक 'बी' डिभिजन लिग फुटबलको आफ्नो अन्तिम  खेलमा जित निकालेको छ ।

बिहीबार भएको अन्तिम खेलमा सातदोबाटोले रानीपोखरी कर्नर टिम आरसिटीलाई १-० गोल अन्तरले पराजित गरेको हो ।

सातदोबाटोस्थित एन्फा कम्प्लेक्समा सातदोबाटोलाई जित दिलाउन माल्डिना आङथुपुले निर्णायक गोल गरे ।

आङथुपुले खेलको ६७ औं मिनेटमा गोल गरेका थिए ।

यस जितसँगै सातदोबाटोले लिगको सुखद अन्त्य गरेको छ । र, सातदोबाटो 'ए' डिभिजन लिगमा उक्लिएको छ ।

सातदोबाटोले दोस्रो स्थानको खुमलटार युथ क्लबलाई ३ अंकले पछि पार्दै उपाधि हात पारेको हो ।

च्याम्पियन बन्ने क्रममा सातदोबाटोले ११ खेलमा २८ अंक जोड्यो । खुमलटारले २५ अंक रह्यो ।

अब सातदोबाटोले आगामी सिजनको 'ए' डिभिजन लिग खेल्नेछ ।

आरसिटीले १३ अंक जोडेर नवौं स्थानमा रहेर लिगको अन्त्य गरेको छ ।

लिगबाट पुल्चोक स्पोर्ट्स क्लब 'सी' डिभिजनमा घटुवा भईसकेको छ ।

उपाधिसँगै सातदोबाटोले १५ लाख रुपैयाँ हात पारेको छ ।

दोस्रो स्थानमा रहेको खुमलटारले १० लाख रुपैयाँ प्राप्त गर्दा तेस्रो भएको बाँसबारीले ८ लाख र चौंथो भएको ब्वाइज युनियनले ५ लाख हात पारेका छन् ।

विजेता टोलीलाई ललितपुर महानगरपालिकाका मेयर चिरीबाबु महर्जन, अखिल नेपाल फुटबल संघ (एन्फा) का अध्यक्ष कर्माछिरिङ शेर्पालगायतले पुरस्कृत गरे ।