एजेन्सी । केलियन एमबाप्पे च्याम्पियन्स लिग इतिहासमा २५ गोल पूरा गर्ने सबै भन्दा युवा खेलाडी बनेका छन् ।
बुधबार राति बार्सिलोनाविरुद्ध गोल गरेका एमबाप्पेले कम उमेरमा २५ गोल पूरा गर्ने कीर्तिमान आफ्नो नाममा लेखाएका हुन् ।
फ्रान्सेली क्लब पेरिस सेन्ट जर्मेन (पीएसजी)का युवा स्टार एमबाप्पेले बार्सिलोनाका स्टार लियोनल मेस्सीको कीर्तिमान भंग गरेका हुन् ।
बुधबार भएको च्याम्पियन्स लिगको दोस्रो लेगको खेलमा एमबाप्पेले पीएसजीका लागि बार्सिलोनाविरुद्ध सुरुवाती गोल गरेका थिए । उनले पेनाल्टीमा गोल गर्दै ३१ औं मिनेटमा पीएसजीलाई अग्रता दिलाएका थिए ।
एमबाप्पेले २२ वर्ष ८० दिनमा च्याम्पियन्स लिगमा २५ गोलको कीर्तिमान कायम राखेका हुन् । यसअघि सो कीर्तिमान बार्सिलोनाका मेस्सीको नाममा रहेको थियो । उनले २२ वर्ष २ सय ८६ दिनमा सो कीर्तिमान कायम गरेका थिए ।
पहिलो लेगमा ४–१ को अग्रता लिएको पीएसजीका लागि दोस्रो लेग सहज थियो । एमबाप्पेको ह्याट्रिक प्रेरित पीएसजीले पहिलो लेगमा बार्सिलोनालाई क्याम्प नाउमा हराएको थियो ।
एमबाप्पेले कीर्तिमान राखेको दोस्रो लेग खेल १–१ को बराबरीमा सकिएको थियो । दोस्रो खेलको नतिजा सहित समग्रमा ५–२ को जित सहित पीएसजीले क्वार्टरफाईनलको यात्रा तय गर्यो ।
यस वर्ष च्याम्पियन्स लिगमा फ्रान्सेली फरवार्डले बार्सिलोनाविरुद्ध ४ गोल गरे । उनी बार्सिलोनाविरुद्ध च्याम्पियन्स लिगको एकै सिजनमा धेरै गोल गर्ने पहिलो खेलाडी बने । मुख्य फरवार्ड नेयमार चोटका कारण मैदान बाहिर रहेपछि पीएसजीको आक्रमण एमबाप्पेले सम्हालेका छन् । एमबाप्पेले लिग वानका पछिल्ला ७ खेलमा ६ गोल गरेका छन् । उनले च्याम्पियन्स लिगमा समेत बार्सिलोनाविरुद्ध नायकत्व प्रर्दशन गरे ।
पीएसजी च्याम्पियन्स लिगको उपाधि पहिलो पटक जित्ने अभियानमा छ । साथै घरेलु लिगको उपाधि रक्षा गर्ने चुनौती समेत उसको समक्ष छ । लिग वान च्याम्पियन क्लब गत सिजन च्याम्पियन्स लिगमा उपविजेतामा सिमित बनेको थियो ।
