धनगढी । काठमाडौंको हिमालयन ह्वाइट हाउसले धनगढीमा जारी चण्डिका ग्रुप लिटल फ्लावर प्रिमियर लिग (एलपीएल) क्रिकेटमा विजयी सुरुवात गरेको छ ।
सोमबार भएको खेलमा लिटल बुद्ध एकेडेमीलाई ८ विकेटले पराजित गर्दै हिमालयन ह्वाइट हाउसले सुखद सुरुवात गरेको हो ।
संघीय प्रहरी इकाई कार्यालयको खेल मैदानमा टस जितेर ब्याटिङ गरेको लिटल बुद्धले १७ ओभर ५ बलमा अलआउट हुँदै ७२ रन बनाएको थियो । उसका लागि रोयल बम र राजेश ऐरले १५/१५ रन बनाए ।
हिमालयन ह्वाइट हाउसका लागि गजेन्द्र बोहराले ५ र सन्दिप शाहीले ३ विकेट लिए ।
लिटलले दिएको ७३ रनको लक्ष्य हिमालयन ह्वाइट हाउसले ११ ओभर ३ बलमा २ विकेट गुमाएर पूरा गर्यो ।
हिमालयनका दीपक बोहराले अविजित ५० र निश्चल थापाले १९ रनको योगदान दिए । बलिङतर्फ लिटल बुद्धका सागर भण्डारी र राजेश ऐरले १/१ विकेट लिए ।
खेलका म्यान अफ द म्याच गजेन्द्र बोहरा भए ।
यस हारसँगै लिटल बुद्ध प्रतियोगिताबाट बाहिरिएको छ । लगातार दुई हार व्यहोर्दै लिटल बुद्ध बाहिरिएको हो ।
शनिबारबाट सुरु प्रतियोगितामा १६ टिमको सहभागिता रहेको छ ।
विजेताले १ लाख २० हजार पाउने छन् ।
त्यस्तै उपविजेताले ६० हजार प्राप्त गर्दा सर्वोत्कृष्ट खेलाडीले १० हजार पाउने छन् ।
उत्कृष्ट ब्याट्सम्यान, बलर र उदयमान खेलाडीले ५/५ हजार पाउने छन् ।
