टेनिस स्टार ओसाकाले किनिन् फुटबल क्लब

एजेन्सी । टेनिस स्टार नोआमी ओसाकाले अमेरिकाको महिला फुटबल क्लबमा लगानी गरेकी छिन् ।

जापानी टेनिस खेलाडी ओसाकाले अमेरिकाको एनडब्लुएसएल लिग खेलिरहेको क्लब नर्थ क्यारोलिना करेजमा लगानी गरेकी हुन् ।

तीन पटकको ग्राण्डस्लाम च्याम्पियन ओसाकाले आफुले अमेरिकाको शीर्ष लिग खेलिरहेको महिला टिम खरिद गरेको बताएकी छिन् ।

'मलाई थाहा छैन म उनीहरू बिना कता हुनेछु,' ओसाकाले भनेकी छिन्, 'मेरो करियरमा मैले धेरै महिला खेलाडीबाट धेरै माया पाएको छु । त्यसैले म नर्थ क्यारोलिनाको मालिक भएको बताउन पाउँदा गर्व लाग्छ ।'

नर्थ क्यारोलिना चार वर्ष अघि स्थापना भएको क्लब हो । क्लबले सन् २०२८ र १९ मा नेसनल वुमन्स सकर लिगको उपाधि जितेको थियो ।

२३ वर्षीय ओसाका अष्ट्रेलियन ओपनको तयारीमा रहेकी छिन् ।

ओसाकाले दुई पटक युएस ओपन र १ पटक अष्ट्रेलियन ओपन जितेकी छिन् ।