‘निष्ठा र ईमानका साथ सकेको गरे’

काठमाडौं । निवर्तमान युवा तथा खेलकुद मन्त्री जगतबहादुर विश्वकर्माले निष्ठा र ईमानका साथ प्राप्त जिम्मेवारी सम्पन्न गरेको बताएका छन् ।

मन्त्रीमण्डल पुनर्गठनमा सरकारबाट बाहिरिएका मन्त्री विश्वकर्माले ठुलो अवसरको रुपमा मन्त्रालय जिम्मेवारी सम्हाल्ने मौका पाएको उल्लेख गर्दै निष्ठा र ईमानका साथ कर्तव्य पुरा गरेको बताएका हुन् ।

‘कति काम गरे ईतिहासले त्यसको समिक्षा त गर्नेनै छ । तर जे जति सकारात्मक उपलब्धि छ, सबै सामुहिक प्रयत्नबाट हासिल भएका उपलब्धि हुन् ।’ मन्त्री विश्वकर्माले खेलपाटीसंग भने, ‘जति गरे निष्ठा र ईमानका साथ गरे । सोचेको जति काम गर्न सकिन भन्ने लाग्छ ।’

मन्त्री विश्वकर्माले एसियन गेम्सको सफलता, छोटो समयमा सागको आयोजना र नतिजा तथा राष्ट्रिय खेलकुद विकास ऐनको निर्माण र कार्यान्वयनलाई आफ्नो कार्यकालको महत्वपूर्ण उपलब्धिको रुपमा ब्याख्या गरे ।

उनले खेलकुद क्षेत्रका विकृति र विसंगतिलाई खेलकुद ऐनमार्फत विधी सम्मत तरिकाले सम्बोधन गर्न सकिएकोमा खुसी ब्यक्त गरे ।

प्रधानमन्त्री केपी ओलीले २०७४ साल चैत २ गते खेलकुद मन्त्रीमा विश्वकर्मालाई नियुक्त गरेका थिए । पहिलो पटक मन्त्रीमण्डलमा सहभागी बनेका विश्वकर्माले ३४ महिना युवा तथा खेलकुद मन्त्रालयको जिम्मेवारी सम्हाल्न मौका पाए ।

मन्त्री विश्वकर्माले दुई कामलाई आफ्नो कार्यकालमा पुरा गर्न नसकिएको स्विकार गरे ।

मुलपानीको अन्तराष्ट्रिय क्रिकेट मैदान निर्माण र कर्णाली प्रदेशमा अन्तराष्ट्रिय स्तरको रंगशलाको काम अघि बढाउन नसकेको उनको पछुतो रह्यो ।

मन्त्रालय सम्हालेको तीन महिनामा जग्गा सम्बन्धि विवाद समाधान गर्न सक्यौ । तर मैदानको काम सक्न विभिन्न प्रतिकुलता सिर्जना भए । उनले भने, तीन पटक बजेट छुट्याउँदा समेत स्थानीय संयन्त्रका कारण कर्णाली प्रदेशको रंगशालाको काम अघि बढ्न सकेन ।’

मन्त्री विश्वकर्माले राष्ट्रिय खेलकुद र १३ औं सागका दौरान बनेका खेल पुर्वाधारलाई आफ्नो कार्यकालको महत्वपूर्ण उपलब्धिको रुपमा उल्लेख गरेका छन् ।