आईपीएलमा १० टिम हुने

एजेन्सी । फ्रेन्चाइज क्रिकेट प्रतियोगिता इन्डियन प्रिमियर लिग (आईपीएल) मा सन् २०२२ बाट १० टिमले सहभागिता जनाउने भएका छन् ।

गत संस्करणको आईपीएल लगत्तै नयाँ संस्कणमा दुई टिम थप गर्ने तयारीमा रहेको भारतीय क्रिकेट बोर्डले सन् २०२२ को आईपीएलबाट टिम थप्ने भएको हो ।

सन् २०२१ को आईपीएलमा पुराना ८ टिमको सहभागिता रहने छ ।

भारतीय क्रिकेट बोर्डले आईपीएलमा दुई टिम थप गर्न तयार रहेको तर सन् २०२२ को संस्करणबाट मात्र टिम थपिने बताइएकाे छ ।

हाल आईपीएलमा ८ फ्रेन्चाइज टिमको सहभागिता रहेको छ ।

सन् २०११ मा पनि टिम थप गर्ने निर्णय भएको थियो । तर बोर्डले केही प्राविधिक कारण देखाउँदै ८ टिमलाई नै निरन्तरता दिएको थियो ।

सन् २०१० मा बीसीसीआईले आईपीएलमा सहभागी हुने टिमका लागि टेन्डर आह्वान समेत गरेको थियो ।

सो समय नयाँ टिमको रुपमा पुने वारियार्सलाई साहारा ग्रुप र तुस्केर्स करेलालाई कोची क्रिकेट प्रालीले किनेको थियो ।

सन् २०१२ मा कोचीलाई आर्थिक कारण देखाउँदै निलम्बन गरिएको थियो । तर पुनेलाई बोर्डले सन् २०१३ सम्म राखेको थियो ।

आईपीएलकाे प्रशासन परिषदले सन् २०१६ मा राजस्थान रोयल्स र चेन्नई सुपर किंग्सलाई निलम्बन गर्दै दुई नयाँ टिम राइजिङ पुने सुपर जाइण्ट र गुजरात लायन्सलाई आईपीएलमा सहभागी गराएको थियो ।

राजस्थान र चेन्नईको दुई बर्षको निलम्बन फुकुवा भएपछि नयाँ टिम रद्व भएको थियो ।